Miksaliste, një qendër për ndihmën ndaj refugjatëve në distriktin Savamala të Beogradit, u shkatërrua të mërkurën për të hapur rrugë për projektin ambicioz të Skelës së Beogradit.
“Kjo është diçka shumë e keqe për refugjatët. Ky vend më ndihmoi mua shumë kur erdha në Serbi”, tha Arman, një refugjat afgan 23-vjeçar teksa punonjësit rrafshonin pjesë të Miksalistes, një qendër e ndihmës në Beograd që ofron ushqim dhe furnizime të tjera për refugjatët nga Lindja e Mesme.
Me urdhër të autoriteteve të qytetit, Miksaliste po prishet për t’i hapur rrugë Skelës së Beogradit, një projekt madhor zhvillimi që do të mbulojë shumicën e bregut të lumit Sava në distriktin Savamala të qytetit.
Savamala është bërë një simbol i jetës urbane të natës në Beograd dhe është quajtur shpesh “Berlini i Ri” pas kafeneve të shumta, klubeve të nates, industrive kreative, si dhe projekteve të transformimit kulturor që kanë mbirë në zonë.
Ndërsa qeveria e Serbisë e sheh Skelën si një kontribut madhor për të ardhmen ekonomike të qytetit, kritikët pohojnë se marrëveshja me Eagle Hills, një kompani me bazë në Emiratet e Bashkuara Arabe, ishte jokushtetuese pasi përfshiu pezullimin e ligjeve të Serbisë për territorin e Skelës.
Shumë njerëz që jetojnë përgjatë lumit Sava thonë se projekti do të jetë i keq për shoqërinë dhe do të shërbejë vetëm për të pasurit.
Ivan Laliç, drejtor i Mikser, një nga organizatorët e qendrës, tha se ndjehet i zhgënjyer me prishjen e Miksalistes, pasi ishte bërë një vend i rëndësishëm për refugjatët që vijnë në kryeqytet.
“Ky ishte një projekt jashtëzakonisht i rëndësishëm ndihme… Nuk e di pse ndodhi kjo, përveç Projektit Ujor të Beogradit. Ne duhet të gjejmë një vend për refugjatët,” tha Laliç.
Miksaliste filloi të punojë si një qendër për grumbullimin dhe shpërndarjen e ndihmës humanitare për refugjatët në gusht 2015. Ajo është e përshtatshme për ta pasi është afër stacionit kryesor të autobusëve të Beogradit, ku qëndrojnë shumica e refugjatëve që vijnë në Beograd.
Rreth 300 deri 350 refugjatë në ditë merrnin veshje, këpucë, ushqim dhe shërbime mjekësore falas.
“Vetëm dje kemi pasur 70 fëmijë në Miksaliste të cilët kishin nevojë për ndihmë,” tha Mikser në një deklaratë.
Që nga gushti i vitit të kaluar, Miksaliste ka pritur rreth 110,000 refugjatë.
Maja Laliç, një nga themelueset e Mikser, tha për BIRN se autoritetet i kanë informuar ata për prishjen vetëm të hënën.
“Nëse ata thonë se na kanë informuar më parë, kjo është një gënjeshtër. Të tjerët kanë pasur trajtim edhe më të keq. Askush nuk i tha atyre asgjë,” tha ajo.
Restoranti Sava Ekspres, shtëpia e familjes, kompania Iskra dhe disa vende të tjera, të gjitha u prishën të hënën në mbrëmje.
Disa njerëz postuan dëshmi në mediat sociale duke pretenduar se rreth 30 persona të maskuar të armatosur me shkopinj, i kontrolluan dhe i lidhën ata në zonën e rrugës Herzegovacka rrugë të Savamalas gjatë procesit të shkatërrimit.
Komisioneri serb për Informimin e Publikut, Radoljub Sabiç, i ka bërë ndërkohë thirrje autoriteteve të qytetit të shpjegojnë rrethanat në të cilat disa rrugë në rrethin Savamala janë shkatërruar në natën e 25 prillit.
“Komisioneri e konsideron me rëndësi të madhe publike që autoritetet e qytetit të zgjidhin dilemat e lidhura me këtë ngjarje, dhe nëse dyshimet e veprimeve të paligjshme ose shkeljes së të drejtave të njeriut konfirmohen, ata duhet të të marrin masa ndaj përgjegjësve”, tha Sabiç.