Pas nëntë muajsh arrati, i dënuari për vrasjen e komisar Dritan Lamaj u arrestua nën një identitet të rremë nga policia hollandeze. Nisin procedurat e ekstradimit.
Arben Frroku, i cili qe në arrati që nga qershori i vitit 2015, u identifikua nga gjurmët e gishtave pasi jetonte me dokumente të falsifikuara nën emrin “Renato Tsepa”. Policia shqiptare deklaroi mbrëmjen e së enjtes (28 prill) arrestimin e tij, dy ditë pasi ish-kryetari i Partisë Demokratike Sali Berisha, pati deklaruar se dispononte informacion se Frroku qe arrestuar në Hollandë dhe se sipas tij, policia e shtetit nën porosinë e Ministrit të Brendshëm Sajmir Tahiri, po pengonte procedurat e verifikimit.
“A e dini që ka dy muaj, dhe i bëj thirrje kryeprokurorit të lidhet me prokurorin e Hollandës, ka dy muaj që thuhet se është arrestuar Arben Frroku dhe Saje qorri nuk çon të dhënat,” deklaroi Berisha në një intervistë në emisionin “Studio e Hapur” në televizionin News 24.
Nga ana e saj, Policia e Shtetit thotë se ka pritur konfirmimin e identifikimit për të dhënë lajmin dhe se konfirmimi qe njoftuar nga ana e Hollandës pasditen e së enjtes.
“Interpol Haga njoftoi sot në orën 17:15 minuta Interpol Tiranën se kishte identifikuar dhe arrestuar shtetasin e shpallur në kërkim ndërkombëtar Arben Frroku, të dënuar nga drejtësia shqiptare me burgim të përjetshëm”, thuhet në njoftimin e policisë.
“Interpol Tirana gjatë ditëve të fundit ka patur disa komunikime me homologët në Hollandë në lidhje me këtë çështje, por vetëm sot pasdite, u konfirmua se shtetasi i paraqitur me dokumente të falsifikuara nën emrin “Renato Tsepa”, ishte shtetasi Arben Frroku, i dënuar tashmë nga drejtësia shqiptare,” thotë policia shqiptare.
Arben Frroku është dënuar si autor i vrasjes së komisarit Dritan Lamaj më 24 shkurt 2013. Biznesmeni Frroku, njëherazi ish-kryetar i një partie politike që u drejtua më pas nga i vëllai, Mark Frroku mohoi autorësinë gjatë procesit, duke përdorur si alibi udhëtimin e tij drejt Greqisë. Avokati i tij pretendoi se Frroku ndodhej në afërsi të Elbasanit, në momentin kur ndodhi vrasja.
Megjithatë, Prokuroria dha një tjetër version në Gjykatën e Krimeve të Rënda. Përmes një eksperimenti policor, grupi hetimor pretendoi se koha ishte e mjaftueshme për Frrokun që të kryente vrasjen dhe të mbërrinte në pikën kufitare në momentin e treguar nga kamerat.
Në anën tjetër, Prokuroria siguroi dëshminë e një personi, i cili përfitoi më pas statusin e mbrojtjes. Dëshmitari okular me emrin e koduar Arben Ndoka pohoi në Gjykatë se e kishte parë Frrokun pa maskë, në makinën prej nga u qëllua Lamaj.
Dy pretendimet u përplasën në Gjykatën e Shkallës së Parë, prej nga doli i fituar Arben Frroku. Ai u shpall i pafajshëm më 3 prill 2015. Ai u dënua në gjykatën e apelit më 29 qershor 2015, pak ditë pasi qe larguar nga Shqipëria.
Vëllai i tij, Mark Frroku, arriti të bëhej deputet në zgjedhjet e vitit 2013, si kryetar i partisë KristianDemokrate, aleate e koalicionit qeverisës të udhëhequr nga Partia Socialiste. Ai dha dorëheqjen si deputet pasi u arrestua, i kërkuar nga drejtësia belge për vrasje.
