Në juglindje të Bullgarisë, qyteti Pazardjik ka vendosur të ndalojë përdorimin e burkës në publik duke hapur një debat parlamentar për mbulimin e fytyrës.
Qyteti jugor bullgar Pazardjik është bërë i pari në Bullgari që ndalon përdorimin e shamisë që mbulon fytyrë, të njohur si burka, në publik.
Ndryshimet në rregulloren komunale për rendin publik që ndalojnë burkën, të propozuara nga këshilltarët nga Fronti Kombëtar Nacionalist për Shpëtimin e Bullgarisë, u mbështetën nga 39 nga 41 që është numri në total i anëtarëve të këshillit komunal.
“Mbulimi i fytyrës në vende publike bie ndesh me normat universale sociale dhe prish parimin e sigurisë së qytetarëve,” thanë mbështetësit e propozimit.
Fillimisht, pati dy propozime për ndalimin e përdorimit të burkës, e cila është bërë shumë e përhapur mes anëtarëve të komunitetit Salafist në Pazardjik gjatë viteve të fundit.
Një version më i lehtë ndalimi u paraqit nga kryebashkiaku Todor Popov, nga partia centriste GERB, i cili propozoi ndalimin e përdorimit të burkës në institucionet publike.
Por të martën Popov e flaku tej propozimin e tij dhe një tjetër propozim më kufizues, i paraqitur nga NFSB, u votua dhe miratua. Të vetmit dy këshilltarë që refuzuan ndalimin e përdorimit të brukës ishin përfaqësues të grupit romë, Euroroma.
Urdhëresa, e cila do të hyjë në fuqi pas shtatë ditësh, ndalon mbulimin e fytyrës në të gjitha hapësirat publike, përfshirë parqe, kopshte, shkolla dhe transporte private dhe publike.
Përjashtime mund të bëhen vetëm për arsye mjekësore dhe profesionale, si edhe gjatë eventesh sportive dhe kulturore.
Ndalimi i përdorimit të burkës nuk do të jetë në zbatim në shtëpitë private në Pazardjik ose në vende adhurimi.
Shkelësit e kësaj do të gjobiten me 300 leva – rreth 150 euro – për shkeljen e parë dhe rreth 1,000 leva – rreth 500 euro – për shkeljet e ardhshme.
Lagja Iztok në Pazardjik, ku jetojnë kryesisht rreth 20,000 romë, është bërë bastion i islamit radikal në Bullgari gjatë viteve të fundit.
Në korrik 2015, prokurorët akuzuan 14 myslimanë – përfshirë imamin e diskutueshëm Ahmed Moussa – nga Pazardjiku, Plovdiv, Asenovgradi dhe Startsevo, për nxitje urrejtjeje fetare nëpërjet predikimit të tyre dhe për promovim propagande të ISIS.
Ndalimi i burkës në Pazardjik hedh bazat për një votim të ardhshëm në parlament për ndalim të përdorimit të saj në niel kombëtar, i propozuar nga koalicioni nacionalist Fronti Patriotik, i cili bashkon NFSB-në dhe VMRO-në, një parti e udhëhequr nga zv/presidenti i asamblesë, Krassimir Karakachanov.
Debati për burkën, niqabin dhe vello të tjera që mbulojnë fytyrën filluan të diskutoheshin pas Prokurori i Përgjithshëm i Bullgarisëm Sotir Tsatsarov, tha se ai i favorizonte të tilla masa më 1 prill.
“Liritë fetare nuk duhet të shkelen, por ne nuk duhet të lejojmë që motive fetare të përdoren për propagandë të paligjshme, qëllime politike dhe radikalizim,” tha Tsatsarov në Pazardjik.
Sulmet e intensifikuara në Europë në 2015 dhe 2016, si edhe kriza e vazhdueshme e refugjatëve në Europë, kanë çuar në një rritje të retorikës anti-myslimane në Bullgari.
