Azem Syla, një deputet nga partia qeverisëse e Kosovës, u vetëdorëzua te policia për t’u përballur me akuzat e korrupsionit, pjesë e një aksioni të madh të policisë vendase.
Azem Syla, një deputet i njohur qeverisë nga Partia Demokratike e Kosovës, i akuzuar të mërkurën në një hetim që e dyshon atë për mashtrim me pronat, u dorëzua në misionin e sundimit të ligjit të BE në Kosovë, EULEX dhe në polici të premten në mëngjes.
Avokati i Sylës, Tome Gashi konfirmoi të premten se klienti i tij ishte vetëdorëzuar në polici.
Zëdhënësi i Prokurorisë së Kosovës, Ekrem Lutfiu i tha BIRN se Syla u dorëzua të premten në mëngjes në pikën e kalimit të kufirit Kosovë-Shqipëri, Vermicë.
Më herët policia mësy shtëpinë e Sylës, por ai nuk ishte atje dhe tha në telefon se ndodhej në Durrës.
“Nuk mora ftesë nga autoritetet… dhe udhëtova jashtë shtetit për një arsye personale,” i tha Syla policisë.
Ai pritet të dalë në Pallatin e Drejtësisë në Prishtinë të premten pasdite, ku do të akuzohet formalisht.
Policia e Kosovës arrestoi gjashtë persona të mërkurën në një hetim për mashtrim me pronësinë e tokës që i kushtoi shtetit 30 milionë euro, si dhe la pa shtëpi disa familje.
Azem Syla, ish-komandant i Ushtrisë Çlirimtare të Kosovës, UÇK, ka siguruar policinë se ai do të bashkëpunojë me autoritetet dhe do të përballet me akuzat e tij të “pabaza”.
Çështja ka në qendër akuzat për shpërdorim të pronës publike, krim të organizuar, pastrim parash, falsifikim të dokumenteve zyrtare, korrupsion dhe mashtrim. Grupi dyshohet se ka pasur gjithashtu lidhje me kriminelë serbë.
Presidenti i sapozgjedhur i Kosovës, Hashim Thaçi, ish-kreu i PDK dhe gjithashtu një ish-shef i UÇK, tha se mbështeste fuqishëm veprimet e institucioneve ligjzbatuese kombëtare dhe ndërkombëtare.