Organi europian i futbollit UEFA votoi për të pranuar Kosovën si anëtaren e 55, gjë që do të thotë se vendi tani mund të hyjë në garat e klubeve europiane.
Kongresi vjetor i UEFA-s të martën në Budapest votoi 28 me 24 për të pranuar aplikimin e Federatës së Futbollit të Kosovës, FFK, për anëtarësim, me gjithë kundërshtimin e fortë të Serbisë, e cila kundërshton çdo njohje të pavarësisë së ish-krahinës së saj.
Presidenti i Kosovës, Hashim Thaçi ka mirëpritur vendimin UEFA-s, e cila gjithashtu përgatit terrenin që vendi t’i bashkohet organizatës botërore të futbollit FIFA.
“Kosova në UEFA! Lajmi më i mirë për tifozët e panumërt në republikën tonë”, ka thënë Thaçi në një postim në Facebook.
Kryeministri Isa Mustafa po ashtu ka shprehur kënaqësinë e tij për suksesin e kërkesës.
“Jam shumë i lumtur që vendi ynë ia doli të arrijë një sukses historik”, ka thënë Mustafa në faqen e tij në Facebook.
Para votimit, presidenti i shoqatës serbe të futbollit Tomoslav Karaxhiç i kishte kërkuar UEFA-s të refuzojë kërkesën, duke thënë se ishte një rast ndërhyjes së politikës në sport.
“Ky është një propozim politik, jo i futbollit. Ne po përballemi me një test të ashpër, duhet t’i themi jo poltiikës, jo përçarjeve që mund të jenë të dëmshme,” tha Karaxhiç.
Vendimi i hap rrugën Kosovës të bashkohet edhe me organin botëror të futbollit FIFA dhe të marrë pjesë në lojërat kualifikuese për Kupën Botërore 2018 në Rusi.
Deri më tani, skuadrat e Kosovës nuk mund të konkurronin ndërkombëtarisht, megjithëse dy vite më parë FIFA lejoi ndeshjet miqësore me kushte të veçanta.
Një prej tyre ishte fjala “Kosovë” me një yllth në fanellat e lojëtarëve.
Agjencia e lajmeve Reuters, raportoi ndërkohë se nuk është e qartë nëse FIFA do të lejojë lojëtarë nga Kosova që kanë luajtur tashmë me kombëtare të tjera të ndryshojnë kombësi.
“E kemi pyetur FIFA-n në mënyrë direkte dhe do të donim të merrnim një përgjigje të qartë, por përpara se kjo të ndodhë nuk mund të them asgjë për këtë,” raportoi Reuters të ketë thënë drejtori ligjor i UEFA, Alasdair Bell.
Zvicra dhe Shqipëria të dyja kanë lojëtarë ndërkombëtarë me rrënjë të Kosovës, tha Reuters.
