Komisioni Europian tha se kërkesat e vizave duhen hequr për shtetasit e Kosovës, por shteti duhet të shtojë luftën ndaj krimit të organizuar, korrupsionit dhe të rafitikojë marrëveshjen kontraversale të kufirit me Malin e Zi.
Komisioni Europian të mërkurën rekomandoi te Këshilli i Bashkimit Europian dhe Parlamenti Europian që Kosova të transferohet të zonën pa viza për qëndrime të shkurtra në zonën Shengen.
Ai tha se Kosova ka përmbushur kërkesat e liberalizimit të vizave.
“Ky është rezultat i punës së lodhshme dhe përpjekjeve të suksesshme të autoriteteve të Kosovës në arritjen e reformave të thella dhe të vështira që prekin sfera si sundimi i ligjit dhe reforma në drejtësi,” tha Komisioneri Europian për Migracionin, çështjet e brendshme dhe shtetësinë, Dimitris Avramopoulos.
Por Komisioni Europian tha gjithashtu se Kosova duhet të shtojë përpjekjet për të zgjidhur çështjet lidhur me krimin e organizuar dhe korrupsionin dhe ratifikimin e një marrëveshjeje të demarkacionit të kufirit me Malin e Zi që opozita e refuzon dhe që ka nxitur protesta në rrugë, të cilat përfunduan në përplasje me policinë në Prishtinë.
Politikanët e lartë të Kosovës përshëndetën rekomandimin si një hap historik përpara.
“Pas dekadave izolim, nuk do të ketë më radhë të gjata pritjeje në ambasada, jo më refuzime. Ne nuk morëm një dhuratë, por e kemi merituar liberalizimin,” tha presidenti i Kosovës Hashim Thaçi.
Në dhjetor të vitit të shkuar, kur ai po shërbente si ministër i jashtëm, Thaçi kritikoi ashpër BE-në kur nuk i dha Kosovës rekomandimin e regjimit pa viza, duke e quajtur “një fyerje direkte të shtetasve të Kosovës”.
Institucionet e BE-së nuk kanë lajmëruar kur do të votojnë ministrat e 28 shteteve anëtare për liberalizimin e vizave për Kosovën.
Shtetasit kosovarë janë të vetmit në Ballkan që duhet të udhëtojnë me viza në zonën Shengen.
