Të burgosurit e Maqedonisë po lançojnë protesta për të kërkuar reduktim dënimi mes zemërimit që shkaktoi vendimi i presidentit Gjorge Ivanov për të pushuar hetimet kriminale ndaj zyrtarëve të lartë.
Të burgosurit që ankohen për drejtësi selektive kanë njoftuar fillimin e protestave në mesditën e të enjtes në të gjitha burgjet e Maqedonisë, së bashku me mitingje paralele përballë burgjeve ku të afërmit e tyre, mbështetës dhe OJQ të të drejtave civile do të shprehin pakënaqësinë e tyre.
Protestat vijnë pasi Presidenti Gjorge Ivanov refuzoi kërkesën për uljen e dënimeve të paraburgosurve që u nënshkrua nga mbi 2.200 të burgosur, më shumë se dy të tretat e të gjithë atyre që u është hequr liria në vend.
“Ata [të burgosurit] nuk duan të lirohen, por të marrin një 30 për qind ulje në dënimet me burg,” tha avokati Zvonko Davidoviç, i cili i dorëzoi presidentit peticionin.
Davidoviç tha se të burgosurit janë të zemëruar nga përgjigjja që morën prej presidentit, i cili i instruktoi ata të nënshkruajnë kërkesa individuale dhe të heqin dorë nga avokati për t’u marrë në konsideratë.
“Njëkohësisht, presidenti fali gjysmën e elitës politike dhe bashkëpunëtorët e tyre pa një ligj ekzistues dhe pa i kërkuar ata të njëjtën gjë. Këto janë standarde të dyfishta dhe drejtësi selektive… të dënuarit ndihen të diskriminuar ndaj kësaj,” tha ai.
Protestat vijnë në kushtet e një krize të thellë politike në vend, e cila shpërtheu më 12 prill, kur presidenti Ivanov befas ndaloi hetimet penale për 56 politikanë dhe bashkëpunëtorë të tyre, shumica e të cilëve vijnë nga radhët e partisë kryesore qeverisëse VMRO DPMNE e ish-kryeministrit Nikola Gruevski.
Prokuroria Speciale e Maqedonisë, e ngritur vjeshtën e kaluar si pjesë e një marrëveshje të ndërmjetësuar nga BE që ka për qëllim dhënien fund të krizës politike në vend, po kryente hetime për krime të nivelit të lartë të shpallura nga përgjimet e paligjshme që u publikuan vitin e kaluar nga opozita e vendit.
Gruevski ishte subjekti i gjashtë hetimeve të anuluara me urdhër të presidentit, që provokoi një sërë protestash të vazhdueshme anti-qeveritare në mbarë vendin, të cilat u quajtën “Revolucioni Shumëngjyrësh”.
Protestuesit në kryeqytet hodhën topa boje në Gjykatën Penale të Shkupit të martën, duke kërkuar vendosjen e sundimit të ligjit dhe krijimin e një gjyqësori të pavarur. Ata akuzojnë VMRO DPMNE se kontrollon sistemin ligjor.
BE-ja dhe SHBA-të kanë kërkuar gjithashtu që Ivanov të tërheqë vendimin e tij, për të ringjallur përpjekjet që zgjidhjen e krizës maqedonase dhe për të vënë reformat e planifikuara që do të siguronin zgjedhje të drejta në rrugë të mbarë.
Për vite të tëra, raportet e Avokatit të Popullit kanë përshkruar kushtet në burgun më të madh të Maqedonisë, Idrizovë, si dhe në objektet e tjera të paraburgimit, si nën-standard.
Burgjet janë kritikuar për infrastrukturë të keqe, mbipopullim dhe kujdes të pamjaftueshëm shëndetësor, si dhe për faktin se shumë të varur nga droga nuk marrin trajtimin e duhur.
BE-ja gjithashtu ka paralajmëruar në mënyrë të përsëritur Maqedoninë për gjendjen e burgjeve të saj, duke i përshkruar ato si të vjetra, të mbipopulluara dhe pa staf.
Kushtet në Idrizovë janë theksuar si më alarmante, sepse burgu ka kapacitet për rreth 900 njerëz, por mban më shumë se dyfishi i atij numri.
BIRN kërkoi një koment në lidhje me protestën e planifikuar nga Lidija Gavrillovska, kreu i Administratës së Burgjeve të Maqedonisë, që është e ngarkuar me drejtimin e burgjeve të vendit, por mori përgjigje në kohën e publikimit.
Në raportin e saj të fundit vjetor për punën e administratës së burgjeve Gavrilovska tha se kishte ndërmarrë “aktivitete të rëndësishme për të përmirësuar procesin e risocializimit të të burgosurve dhe përmirësimin e kapaciteteve të akomodimit, si dhe për rritjen e kapacitetit të stafit të burgjeve”.
