Një raport mbi falimentimin e Bankës Tregtare Korporative akuzoi ish pronarin e saj Tsvetan Vasilev se ka blerë 1.25 miliardë euro asete të bankës përmes kompanive të lidhura me të.
Tsvetan Vasilev, një bankier bullgar që tashmë jeton në ekzil në Serbi, plaçkiti 2.5 miliardë leva (rreth 1.25 miliardë euro) nga Banka Tregtare Korporative (CCB sipas akronimit në anglisht) para se banka të falimentonte, bëhet e ditur nga një raport i kompanisë konsulente ndërkombëtare AlixPartners, raport që u bë publik këtë javë.
Sipas AlixPartners, e cila qe punësuar për të menaxhuar falimentimin dhe për të gjurmuar asetet e ÇB, banka veproi si një skemë piramidale, duke dhënë kredi të pasiguruara për një rrjet kompanish të lidhura me Vasilev.
“Analiza jonë e aktivitetit komercial të CCB nga viti 2009 zbulon përdorimin në shkallë të gjerë të kreditit për klientët si kanal për nxjerrjen e gabuar apo ilegale të fondeve nga banka,” shkruhet në raportin e AlixPartners.
“Duket se në shumicën e rasteve, kjo sasi parash u përdor në përfitim të aksionerëve realë të shumicës të bankës, z. Vasilev, ortakëve dhe enteve të lidhura me to.”
Raporti konfidencial prej 500 faqesh, u bë publik të martën, pas amendimit të ligjit të Bullgarisë për falimentimin e bankave, i cili nuk lejonte publikimin.
Raporti gjurmon operacionet bankare të CCB nga janari 2009 deri në mars 2015, duke zbuluar një portofol prej 472 kredish të papaguara te 243 huamarrës korporativ.
Më shumë se gjysma e kredive iu dhanë kompanive të lidhura me pronarin, pretendoi raporti.
“Ka lidhje shumë të fuqishme mes klientëve-huamarrës,” shkruhet në raport.
Auditorët janë pesimistë sa i përket mundësisë për të rikuperuar paratë, duke vlerësuar se vetëm 650 deri në 800 milionë leva (mes 325 dhe 400 milionë eurove) mund të merren sërish nga kredimarrësit.
“Për shkak se shumica e përfituesve kanë sipërmarrje jofunksionale, ka shumë pak garanci ose garancitë janë të pavlefshme,” shkruhet në raport.
Raporti veçon tetë kompani të cilat morën më shumë se 1 miliardë leva kredi (gjysmë miliardi euro).
Mes tyre janë kompania e telekomunikacionit Vivacom, shitësi me pakicë i karburanteve Petrol dhe Fabrika e Xhamit në Serbi.
ÇB i pati dhënë 221 milionë leva kredi Fabrikës Serbe të Xhamit përmes dy kompanive të lidhura – Glass Industry dhe Balkan Glass, të regjistruara në Serbi në konsorcium me një kompani të quajtur Rubin.
Sipas raportit, Balkan Glass dukshëm qe regjistruar me synimin e vetëm për të financuar aktivitetet dhe deficitet e Fabrikës Serbe të Xhamit, e cila kishte raportuar vazhdimisht humbje.
Asnjë nga kreditë e dhëna nuk u pagua.
AlixPartners kritikoi gjithashtu rregullatorin e sistemit bankar të Bullgarisë, Bankën Kombëtare të Bullgarisë dhe kompaninë audituese të CCB, KPMG – për neglizhencë dhe inaktivitet në zbulimin e parregullsive që sollën kolapsin e bankës.
As Banka Kombëtare e Bullgarisë dhe as KPMG nuk reaguan ndaj raportit deri më tani.
Vasilev ka jetuar në Beograd që nga viti 2014, ku mbërriti pak ditë pasi ÇB falimentoi në kolaptin më të madh bankar në historinë e Bullgarisë. Asetet e humbura të bankës vlerësohen në 2 miliardë euro.
Bullgaria ka kërkuar ekstradimin e tij, por procesi i ekstradimit gjendet në Gjykatën e Lartë në Beograd. Vasilev pretendon se do të vuajë përndjekje në Bullgari dhe raportohet se ka aplikuar për azil politik në Serbi.