Një fushatë në mbështetje të Tirana Gay PRide ka arritur të tërheqë shumë mbështetës të komunitetit LGBTI në Shqipëri, duke u dhënë pjesëtarëve shpresën se shoqëria mund të jetë më e hapur ndaj preferencave të tyre seksuale.
Qindra mbështetës të komunitetit LGBTI, aktivistë të të drejtave të njeriut dhe figura publike në Shqipëri dhe rajon, janë bërë pjesë e fushatës sensibilizuese #Kurajo, e cila synon t’i nxisë pjesëtarët e komunitetit të shfaqin haptazi seksualitetin e tyre.
Fushata filloi pas postimit të një fotoje nga një aktivisteje dhe më pas u bë një hit, kur qindra mbështetës, pjesëtarë të komunitetit, gazetarë dhe madje edhe ministri i Çështjeve Vendore, Bledi Çuçi pozuan me foton e eventit të paradës së përvitshme me biçikleta Tirana Gay PRide, që do të mbahet më 11 maj.
“Vendosa të marr pjesë në fushatën #kurajo kur u bë një nismë në rrjetet sociale. Unë dhe bashkëshorti im kemi shumë miq që janë pjesë e komunitetit LGBTI dhe doja të tregoja mbështetje për ta,” tha për BIRN, Kostana Morava, gazetare radiofonike në Shqipëri.
“Shpresoj që sa më shumë mbështetës t’i bashkohen paradës së këtij viti për të parë nga afër se edhe këta persona janë si gjithë të tjerët, të cilët kanë dashuri për të dhënë dhe që u vijnë gjërat shumë natyrshëm”, shtoi ajo.
Aleancat LGBT dhe ProLGBT e kanë përdorur tradicionalisht rrjetin social Facebook për ta shtrirë komunikimin te më shumë njerëz, si për të sensibilizuar shoqërinë, ashtu edhe për të tërhequr mbështetje.
“Pjesëtarët e komunitetit janë të habitur dhe të prekur nga solidarizimi i treguar këtë vit. Mesazhi #kurajo, arriti tek ata dhe i dha shpresë për më shumë pranim në shoqëri,” tha për BIRN Xheni Karaj, drejtuese e Aleancës LGBT në vend.
“Komuniteti ynë përballet ende me stigmatizim dhe sfida nga familja dhe shoqëria, gjë që do të ndalojë disa prej pjesëtarëve të marrin pjesë në paradën e këtij viti. Por për herë të parë, falë fushatës, disa prej tyre patën kurajën të shfaqen me fytyrë në mbrojtje të të drejtave të tyre”, shtoi ajo.
Parada e pestë në mbrojtje të të drejtave të komunitetit LGBTI në Shqipëri do të ushtrojë presion për miratimin e të drejtave të barabarta të bashkëjetesës së personave të gjinisë së njëjtë, ndërsa tre çifte të komunitetit do të provojnë të sfidojnë sistemin përmes litigimit strategjik.
“Arsyeja përse mbështes dhe marr pjesë në lëvizjen për të drejtat e komunitetit jo-heteroseksual është sepse besoj se orientimi seksual nuk i përcakton vlerat e tua si njeri. Orientimi seksual nuk të bën prind, fëmijë, mik, qytetar apo profesionist më të mirë,” tha për BIRN Adela Halo, doktorante në Historinë e Mendimit Politik dhe Drejtësi në universitetin Queen Mary në Londër.
Raport-Progresi i Komisionit Europian u shpreh në nëntor të vitit të kaluar se ndërgjegjësimi për të drejtat e komuniteti LGBTI në Shqipëri është ende i pakët dhe se Shqipëria duhet të eliminojë nga legjislacioni i saj diskriminimin ndaj personave transeksualë dhe interseksualë.
