Zëvendëskryeministri Tomislav Karamarko, i cili është njëkohësisht kryetar i partisë së djathtë HDZ, përballet me akuzat për konflikt interesi pasi bashkëshortja e tij dyshohet se punon për një lobues të kompanisë hungareze të energjisë MOL, e cila është në mosmarëveshje me Kroacinë.
Një gazetë kroate deklaroi të martën se ka prova se një kompani që i përket Ana Saric Karamarko – gruas së zëvendëskryeministrit dhe kryetarit të Bashkimit Demokratik të Kroacisë, HDZ, Tomislav Karamarko – ka marrë një pagesë prej 60 mijë eurosh për të këshilluar një lobist që punon për kompaninë energjetike hungareze MOL.
Sipas kontratës, të cilën gazeta Nacional thotë se e ka në disponim, Josip Petrovic, lobisti për MOL – kompania që aktualisht është nën proces arbitrazhi me Kroacinë mbi pronësinë dhe administrimin e kompanisë kroate të energjisë INA – pagoi paratë mes shkurtit 2013 dhe dhjetorit 2015 për shërbime konsulence dhe analizë medieje.
Petrovic, miqësia e të cilit me Karamarkon u zbulua në prill, ka qenë në stafin menaxherial të INA dhe dëshmitar në procesin ndërkombëtar të arbitrazhit në Londër mbi të drejtat menaxhiale të INA. INA është një kompani pjesërisht nën pronësi shtetërore në të cilën shteti kroat ka 44.8 për qind të aksioneve ndërsa MOL ka 49 për qind. Megjithëse MOL nuk ka shumicën e aksioneve, ajo ka shumicën e vendeve në bordet e kompanisë.
MOL i bleu aksionet e fundit te INA kur Ivo Sanader qe kryeministër i Kroacisë. Gjykata supreme e Kroavcisë e shopalli Sanader fajtor më 2014 për marrjen e ryshfeteve prej dhjetë milionë eurosh për të shtyrë shitjen e të drejtave menaxheriale të INA te MOL.
Gjithsesi, Gjykata Kushtetuese e rrëzoi këtë vendim në qershor 2015 dhe urdhëroi nisjen e procesit gjyqësor nga e para.
Para vendimit të Gjykatës Supreme, qeveria e Kroacisë nisi një proces gjyqësor kundër MOL mbi të drejtat e menaxhimit në një gjykatë ndërkombëtare arbitrazhi.
Sipas dokumenteve të publikuara nga Nacional, Petrovic pagoi shuma mujore nga kompania e tij, Peritus savjetovanje, te llogaria e kompanisë së Saric Karamarko, Drimia.
Saric Karamarko dhe Drimia u vunë në vëmendjen e medias fillimisht në maj 2015 kur u zbulua se bashkëshorti i saj, Tomislav, po përdorte një makinë nën pronësinë e kompanisë së bashkëshortes.
Faqja e informative e internetit Telegram publikoi gjithashtu dokumente të martën ku thuhet se tregohet se Petrovic mori rreth 970,000 euro për shërbime konsulence nga MOL mes janarit 2011 dhe gushtit 2015.
Saric Karamarko i tha gazetës së përditshme Jutarnji list të martën se kompania e saj po jepte shërbime të rregullta marketingu dhe komunikimi për kompaninë e Petrovic.
“Çasti kur u bë e qartë se bashkëshorti im mund të bëhej anëtar i një qeverie, unë e informova z. Petrovic se do t’i jepja fund kontratës,” tha ajo.
Zëvendëskryeministri Karamarko hodhi poshtë aludimet për konflikt interesi dhe tha se media dhe autoritetet po e hetonin kompaninë e bashkëshortes së tij prej vitesh.
“Veprimtaria e kompanisë së bashkëshortes sime në shumë raste përgjatë viteve të fundit, vetëm me qëllimin që të bëhej presion politik mbi mua personalisht, është shënjestruar nga organe të ndryshme të shtetit,” shkroi ai në një njoftim për shtyp.
Ai shtoi se, “kur vjen puna te aludimet për një konflikt të mundshëm interesi për mua personalisht… unë personalisht do t’i dërgoj një kërkesë zyrtare Komisionit [parlamentar mbi konfliktin e interesit]… duke i kërkuar të hetojnë në tërësi këtë rast dhe të informojnë publikun,” përfundoi ai.
Karamarko e mori postin e zëvendëskryeministrit në janar. Partneri i vogël në koalicionin qeverisës, Lista e Urës së Të Pavarurve, MOST, ka kritikuar ashpër marrëdhënien private mes Petrovic dhe Karamarko.
