Abdelhamid Abaaoud, i besuar si ideatori pas sulmeve terroriste në Paris në nëntor të vitit 2015, bëri një përpjekje të dështuar për të hyrë në Bullgari, u tha në seancë gjykimi në Belgjikë.
Në përpjekje për të arritur në Belgjikë për të marrë pjesë në një sulm terrorist, organizatori i planit për sulmin në Paris, Abdelhamid Abaaoud u përpoq të hyjë në Bullgari, në dhjetor 2014, duke kaluar një lum në kufirin me Greqinë apo Turqinë, u tha në një seancë në gjykatën e Brukselit këtë javë.
Atë e ndaluan dhe iu desh të kthehej mbrapsht, kanë zbuluar provat nga gjyqi i qelizës terroriste Verviers.
“Ne patëm një problem me lumin. Bullgarët lëshuan më shumë ujë. U përpoqëm, notuam, por na u desh të ktheheshim mbrapsht,” raportohet t’i ketë thënë xhihadisti një të afërmi në një bisedë telefonike.
Gjyqi u hap të hënën në Bruksel për 16 persona, nëntë prej të cilëve janë ende në arrati, të akuzuar për pjesëmarrje në një grup të lidhur me terroristët që hartuan sulmet terroriste islamike në Paris dhe Bruksel.
Abaaoud, një shtetas belg 27-vjeçar që u vra në një përleshje me policinë në Paris vetëm dy ditë pas bombave vetëvrasëse, dyshohet të ishte lideri.
Qeliza terroriste u shpërbë në një mësymje të policisë në qytetin lindor belg, Verviers në janar 2015.
Policia thotë se qeliza planifikonte të rrëmbente dhe vriste oficerë policie me urdhër të ISIS në Siri. Autoritetet besojnë se Abaaoud po drejtonte qelizën me telefon nga Greqia.
Sipas gjykatës, nga fundi i vitit 2014 ai ishte i dëshpëruar të kthehej nga Siria, ku luftonte me ISIS, për të marrë pjesë në sulmin terrorist të planifikuar për në Belgjikë.
Bisedat e tij të përgjuara tregojnë se ai u përpoq të fluturonte në Belgjikë, me gjasa nga Athina, me një pasaportë false, por u kap nga autoritetet në aeroport.
Ai nuk u arrestua dhe nuk u dorëzua, gjithsesi. Në vend të kësaj, ai përfitoi nga shërbimi i një prostitute nga Belgjika, e cila e shoqëroi atë në atdhe, ku të dy po shtireshin si një çift turistësh.
Më 13 nëntor të vitit të shkuar, ai mori pjesë në sulmet e koordinuara në Paris, ku u vranë 130 persona dhe u plagosën mbi 350 të tjerë, në sulmet terroriste më vdekjeprurëse në Europë, që nga bomba në tren në Madrid në vitin 2004.
