Vendet anëtare të BE-së si Greqia, Italia, Kroacia dhe Sllovenia dhe vendet joanëtare si Serbia, Shqipëria, Mali i Zi dhe Bosnja ranë dakord të punojnë së bashku për një strategji zhvillimi për Rajonin e Adriatikut dhe Jonit.
Greqia, Kroacia, Shqipëria, Bosnja, Mali i Zi, Italia, Serbia dhe Sllovenia kanë rënë dakord nën koordinimin e Komisionit Europian për të krijuar projekte të përbashkëta të projektuara për të nxitur zhvillimin e qëndrueshëm ekonomik, infrastrukturën dhe turizmin.
Ministrat e jashtëm dhe ata të integrimit në BE dhe në tetë vendet që morën pjesën në të takimin e së enjtes në Dubrovnik të Kroacisë nënshkruan një deklaratë të përbashkët bashkëpunimi në forumin e parë vjetor të “Strategjisë për Rajonin Adriatik dhe Jonian”, EUSAIR, një forum makro-rajonal i BE-së.
Nisma synon të nxisë projekte rajonale në katër fusha kryesore: zhvillimi blu [detar], transporti, cilësia e mjedisit dhe turizmi i qëndrueshëm.
Strategjia nuk është i mbuluar nga një fond i veçantë, por Komisioni do të promovojë koordinimin e fondeve strukturore dhe ato të Instrumentit të Para-Anëtarësimit, IPA, mes burimeve të tjera europiane me qëllim të financimit të projekteve të përbashkëta.
Komisionerja Europiane për Politikën Rajonale Corina Cretu tha se strategjia ka potencial jo vetëm për të rritur konkurrencën dhe lidhjen në rajon, por edhe për të ndihmuar integrimin.
“EUSAIR promovon bashkëpunimin ndërmjet BE-së dhe vendeve jo anëtare, për t’u siguruar që askush nuk është lënë pas në rrugën e prosperitetit”, tha ajo.
Cretu theksoi se një nga qëllimet kryesore është reduktimi i pabarazisë në mes vendeve anëtare në BE, që i përkasin rajonit dhe atyre joanëtare dhe trajtimi i njëllojtë i çdo vendi që është pjesë e strategjisë.
“Ju siguroj se nuk do të ketë asnjë diskriminim [në projekte mes vendeve], ne duam vërtetë të ndihmojnë Ballkanin dhe ta bëjmë atë më të qëndrueshëm, pasi kjo shumë e rëndësishme për Europën si një e tërë, ” tha Cretu, duke u përgjigjur një pyetje të BIRN se si do të bëhet vendimmarrja për projektet brenda vendeve të EUSAIR.
Ministrat e jashtëm të vendeve joanëtare në BE thanë gjatë forumit se puna me vendet e BE-së dhe Komisionin Europian për të krijuar një strategji të përbashkët në sektorët kyç do të ndihmojë integrimin e tyre në BE.
Ministri i Jashtëm shqiptar, Ditmir Bushati, megjithatë , tha është e rëndësishme që strategjia të përfshijë edhe Kosovën e Maqedoninë.
“Përfshirja e tyre është e rëndësishme për krijimin e kohezionit territorial në rajon, më shumë se sa të krijohet akses më i mirë në bregdetin Adriatik dhe Jonian”, tha ai.
Ministri i Jashtëm kroat Miro Kovaç tha se vendet e rajonit duhet të ndajnë të njëjtin vizion për të ardhmen për të krijuar vende pune dhe rritje ekonomike.
Për të mundësuar zbatimin e strategjisë, ministrat ranë dakord të krijojnë organe si koordinatorë kombëtarë dhe grupe drejtuese, së bashku me platformën e palëve që do të reflektojë mendimet e profesionistëve nga të gjitha vendet e EUSAIR për katër shtyllat e strategjisë.
Greqia do të kryesojë EUSAIR nga 1 qershori dhe në vitin e ardhshëm do të diskutohen projektet konkrete të ministrive të tetë vendeve.
