Gjykata e Krimeve të Rënda shpalli fajtor dhe dënoi me proces të shkurtuar ish-prokurorin e Krujës, Haxhi Giu, i cili do të vuajë 2 vjet e katër muaj në qeli. Fajtor u shpall edhe qytetari që tentoi ta korruptonte.
Ish-prokurori Haxhi Giu u shpall fajtor të enjten nga Gjykata e Krimeve të Rënda në Tiranë, pasi u arrestua dhjetorin e kaluar në kushtet e flagrancës, nën akuzën e “korrupsionit pasiv”. Ish-prokurori i Krujës u dënua me 3 vjet e 6 muaj burg, por ai përfitoi uljen e 1/3 së dënimit, pasi pranoi gjykimin me procedurë të shkurtuar.
Sipas vendimit të Gjykatës së Krimeve të Rënda, ish-prokurori Giu do të vuajë përfundimisht 2 vjet e 4 muaj në qeli.
Bashkë me Giun, Gjykata e Krimeve të Rënda shpalli fajtor edhe Aleks Shporin për akuzën e “korrupsionit aktiv”. Sipas vendimit, Shpori do të vuajë 1 vit e 4 muaj heqje lirie. Gjykata urdhëroi gjithashtu konfiskimin e 28 800 eurove, të cilat ishin bllokuar gjatë operacionit të koduar “Reforma”.
Haxhi Giu u arrestua në Krujë më 2 dhjetor 2015 dhe u akuzua për “korrupsion pasiv”, pasi ishte vendosur prej më shumë se 2 muajsh nën hetim dhe përgjim nga Prokuroria e Krimeve të Rënda, përgjegjëse për hetimin e zyrtarëve të lartë.
Sipas hetimit të prokurorisë, i pandehuri Aleks Shpori i kishte kërkuar prokurorit Giu të zbuste akuzën për vëllanë e tij, Gjon Shpori, i cili ndodhej i arrestuar për veprën penale të “trafikut të lëndëve narkotike”. Prokurori Giu ia kishte bërë të qartë se pozita penale e të vëllait ishte e rëndë, por sipas prokurorisë, Aleks Shpori tregoi këmbëngulje dhe depozitoi 29 mijë euro në një pikë të këmbimit valutor, si “garanci për prokurorin”.
“Pas këtij takimi, Prokurori Haxhi Giu vihet në lëvizje për të plotësuar kërkesën korruptive të shtetasit Shpori. Ai i dërgoi informacion Prokurorisë së Përgjithshme, duke kërkuar zbutjen e pozitës së shtetasit Gjon Shpori, por kjo kërkesë nuk u pranua,” thuhet në hetimin e Prokurorisë së Krimeve të Rënda.
I kundërshtuar nga Prokuroria e Përgjithshme, Giu vijoi procesin gjyqësor, në fund të të cilit Gjon Shpori u dënua me 8 vite burg. Pas vendimit, ish-prokurori i Krujës është takuar me Aleks Shporin në pikën e këmbimit valutor në Tiranë, duke i thënë atij se nuk mundi të bënte asgjë për të vëllanë. Ndërsa Shpori, sipas Prokurorisë, ka tërhequr paratë e garancisë pa e paguar Giun.
Në këtë moment, policia ka nisur operacionin gjatë të cilit u arrestuan Haxhi Giu dhe Aleks Shpori, si dhe u sekuestrua shuma prej 28 800 eurosh.
Haxhiu Giu nuk është prokurori i vetëm i arrestuar për veprën penale të korrupsionit. Në nëntor 2015, prokurori i Fierit, Petrit Vukaj u arrestua gjithashtu nën akuzën e “korrupsionit pasiv”, ndërsa Gjykata e Apelit e la në “arrest shtëpie”. Aktualisht, Vukaj është në proces gjykimi.
