Zbulimi i abuzimit fizik dhe seksual të minoreneve në jetimoren e Shkodrës ka provokuar zemërim në Shqipëri – dhe një luftë fjalësh për të gjetur fajtorët.
Zbulimi i abuzimit të fëmijëve në një jetimore në Shkodër ka zemëruar shumë shqiptarë dhe ka ekspozuar të metat e sistemit të kujdesit të fëmijëve në vend.
Lajmi u bë publik kur zyra e Prokurorit në Shkodër të mërkurën urdhëroi arrestimin e Albana Llazanit, ish-drejtoreshë e Qendrës Rezidenciale të Fëmijëve.
Policia gjithashtu arrestoi tre punonjës të jetimores që duhej të kujdeseshin për fëmijët.
Zyra e Prokurorit të Përgjithshëm i tha BIRN se një hetim filloi gjashtë ditë më parë për jetimoren e Shkodrës, pasi një raport zyrtar nga Avokati i Popullit shkroi rreth keqtrajtimit fizik të fëmijëve në qendër.
“Hetimet jo vetëm konfirmuan dhunën fizike ndaj fëmijëve, por gjithashtu zbuluan se tre vajza të moshës gjashtë, tetë dhe 11 vjeçe ishin abuzuar seksualisht ndërsa të tjerë mbi 14 vjeç, ishin abuzuar fizikisht dhe ishin detyruar të kryenin punë të rëndë nga kujdestarët,” tha burimi zyrtar.
Nuk është e qartë se kush do të akuzohet për abuzim seksual. Burimet i thanë BIRN se hetimet po vazhdojnë për të verifikuar dëshmitë e vajzave.
Çështja ka nxitur debat të fortë publik, ndërsa zyrtarët e qeverisë akuzojnë zyrtarët në bashkinë Shkodër se nuk e kanë përballuar situatën dhe kanë dështuar në caktimin e profesionistëve në krye të jetimores, që është gjithashtu një strehë për fëmijët e familjeve në nevojë.
Ministri i Mirëqenies Sociale, Blendi Klosi, të enjten gjithashtu tha se e ka fajin sistemin gjyqësor për faktin se në të shkuarën gjykatat “nuk kanë marrë masa të rënda ndaj punonjësve që keqtrajtonin fëmijët”.
Ai tha se organet ministrore të kontrollit në të shkuarën kanë hasur probleme në jetimore, por nuk janë marrë masa kundër stafit.
Në Facebook të enjten, drejtori i Inspektoratit të Punës, Dritan Ylli, tha se asnjë punonjës social nuk e kishte vizituar jetimoren e Shkodrës në tre vjet.
“Ne rekomanduam disa herë që bashkia e Shkodrës të caktonte një punonjës social… por kur kjo u bë, punonjësi nuk ishte i kualifikuar për vendin e punës,” tha ai.
Elda Spaho Bleta, një specialiste e mbrojtjes së fëmijëve, i tha BIRN se për të parandaluar episode të tilla ishte e nevojshme të punësoheshin persona të duhur për t’u kujdesur për fëmijët në nevojë.
“Ata duhet të kenë kualifikime të duhura profesionale, pa rekord kriminal dhe me një standard të lartë moral dhe etik në vendin e punës, si dhe dedikimin e nevojshëm për fëmijët,” tha ajo.
Ajo theksoi se qendra të tilla në Shqipëri nuk e kanë një politikë për mbrojtjen e fëmijëve, – një dokument që liston të gjitha standardet dhe procedurat në rast incidentesh.
“Ky lloj institucioni kërkon gjithashtu mbikëqyrje me kamera, që do të ndihmonte shumë në parandalimin e gjërave të tilla,” sugjeroi ajo.
E njëjta specialiste gjithashtu theksoi se Shërbimet Sociale, një organ i ministrisë së mirëqenies sociale duhet të jenë përgjegjës për kryerjen e monitorimeve të rregullta në qendra të tilla, siç e kërkon ligji.
Ajo gjithashtu ngriti pyetje rreth faktit nëse është bërë një monitorim i tillë dhe përse nuk janë marrë masa parandaluese.
“Duhet të kemi parasysh se stafi për mbrojtjen e fëmijëve në bashkitë shqiptare është i vogël ndërsa kemi 800,000 minorenë dhe nivele të larta të dhunës,” përfundoi ajo.
