Produktet e para të kanabisit të ligjshëm do të përdoren për të trajtuar sëmundje të rënda dhe pritet të jenë të disponueshme në farmacitë Maqedonase nga kjo javë.
Vaji i kanabisit me një përqendrim të ulët të kanabinoideve që kanë efekte psikotrope do të jetë në dispozicion për pacientët pa recetë mjekësore nga kjo javë, tha të martën Marija Darkovska, kreu i Agjencisë së Maqedonisë për Barnat Mjekësore.
Gjithashtu këtë javë, mjekët specialistë maqedonas do të fillojnë trajnimin se si të përshkruajnë produkte më të forta të kanabisit që do të jenë në dispozicion deri në fund të qershorit.
“Do të ketë dy lloje të vajrave në farmaci. Ai me më pak se 0.2 për qind të kanabinoideve do të jenë në dispozicion pa recetë në fillim të kësaj jave,” tha Darkovska.
“Lloji tjetër i vajit do të ketë më shumë se 0.2 për qind të kanabinoideve dhe do të jetë në dispozicion vetëm me recetë. Ky vaj duhet të jetë në farmaci deri në fund të qershorit, kur kemi në plan të përfundojmë trajnimin për mjekë specialistë,” shtoi ajo.
Ligji që rregullon këtë çështje thotë se vetëm neurologët, radiologët, specialistët e sëmundjeve infektive dhe onkologët do të lejohen të japin receta të marijuanës mjekësore për pacientët.
Pritet që përdorimi i saj të ndihmojë ata me sëmundje malinje, epilepsi, HIV, sklerozë të shumëfishtë dhe të tjerë.
Ky veprim vjen pasi ministri i shëndetësisë Nikolla Todorov paraqiti një ndryshim ligjor në mes të majit që lejonte përdorimin e marijuanës për qëllime mjekësore.
Filip Dostovski, një aktivist për legalizim mjekësor të marijuanës dhe një anëtar i shoqatës Alternativa e Gjelbër, tha se fushata e ndërgjegjësimit gjatë viteve të fundit ishte shpërblyer.
“Disa vite më parë maqedonasit nuk i njihnin përfitimet e marijuanë mjekësore. Ideja [për legalizim] nisi të përhapet shumë shpejt, pasi kemi organizuar disa seminare … që rritën ndërgjegjësimin,” tha Dostovski.
Në shtator të vitit të kaluar, agjencia M-Prosepekt publikoi një sondazh të opinionit mbi temën e legalizimit të marijuanës mjekësor, i cili sugjeronte se 70 për qind e maqedonasve e mbështesnin legalizimin, ndërsa 28 për qind ishin kundër tij.
Kjo përfaqëson një rritje prej 20 për qind të atyre që e mbështesin legalizimin e marijuanës mjekësore në krahasim me një sondazh të ngjashëm të opinionit të kryer në vitin 2013.
I njëjti sondazh i publikuar vitin e kaluar tregoi 34 për qind mbështetje për legalizimin e përgjithshëm të marijuanës, ku 63 për qind ishin kundër.
Prodhimi ilegal dhe shitja e marijuanës mbetet e dënueshme nga një deri në dhjetë vjet burg në Maqedoni.
Deri më tani, 13 vende të BE-së e kanë legalizuar përdorimin e marijuanës për qëllime mjekësore.
I pari vend në Ballkan që lejoi pacientët të blinin ligjërisht dhe të përdornin produkte të marijuanës përpara Maqedonisë, ishte Kroacia në tetor të vitit të kaluar.
