Një sondazh i qendrës IDRA vlerëson se perceptimi i qytetarëve shqiptarë për korrupsionin nuk ka ndryshuar, krahasuar me tre vjet më parë, ndërkohë që 89 për qind besojnë se institucionet publike janë të korruptuara.
Kurba e korrupsionit ka qenë një çështje mjaft e debatuar përgjatë tre viteve të qeverisjes “Rama”, por një sondazh i publikuar nga qendra IDRA tregon se perceptimi i qytetarëve për të ka mbetur në vendnumëro. “Korrupsioni në Shqipëri- Perceptime dhe Përvoja”, sondazh i kryer përmes intervistimit të njëmijë qytetarëve gjatë muajve janar-shkurt 2016 tregon se armata më e madhe e shqiptarëve, 37 për qind, mendon se korrupsioni ka mbetur njësoj, krahasuar me tre vjet më parë.
Sondazhi vlerëson gjithashtu se 33 për qind e qytetarëve të intervistuar mendojnë se korrupsioni është rritur, përkundrejt 26 për qind që mendojnë se është ulur.
“Perceptimi i qytetarëve shqiptarë për korrupsionin në vend mbetet i lartë. Pothuajse 89 për qind e qytetarëve mendojnë se korrupsioni është i përhapur ose shumë i përhapur mes zyrtarëve publikë,” vlerëson raporti i IDRA.
Qytetarët shqiptarë vazhdojnë t’i shohin shumicën e institucioneve publike si të korruptuara, edhe pse mes tyre vërehen diferenca të dallueshme. Punonjësit e doganave, gjykatësit dhe prokurorët shihen si më të korruptuarit, sipas raportit, ndërsa mësuesit, drejtuesit fetarë, presidenti i Republikës dhe mediat renditen mes institucioneve që konsiderohen si më “të ndershmet”.
IDRA, think tank i përbërë nga një grup ekspertësh të pavarur i ka krahasuar të dhënat me sondazhin e mëparshëm, të realizuar në vitin 2010, prej nga rezulton se edhe mes institucioneve më pak të korruptuara, besimi i publikut ka pësuar bjerrje. Perceptimi për Presidentin, drejtuesit fetarë dhe mediat ka shënuar disa pikë rënie krahasuar me vitin 2010, ndërkohë që besimi për policinë e shtetit dhe mësuesit e shkollave publike ka shënuar përmirësime.
Ndonëse gjykimi për korrupsionin si fenomen mbetet i pandryshuar, sondazhi vlerëson një rënie të përvojave personale të qytetarëve me korrupsionin. Në vitin 2010, 57 % e të intervistuarve raportonin se kishin përvoja personale rryshfeti. Për vitin 2015, kjo shifër ka rënë në 44 për qind.
Sa i përket luftës kundër korrupsionit, qytetarët shqiptarë rendisin në krye organizatat ndërkombëtare, të ndjekura nga Policia e Shtetit dhe Media. Megjithatë, krahasuar me vitin 2010, roli i medias në luftën korrupsionit është zbehur në sytë e qytetarëve.
Gjykatat vazhdojnë të perceptohen si gjerësisht të korruptuara nga qytetarët shqiptarë, të cilat renditen në fund të tabelës si institucionet që ndikojnë më pak në luftën kundër korrupsionit.
Të pyetur për situatën ekonomike në vend, shumica e të anketuarve e shohin atë të zymtë. Sipas sondazhit të IDRA, 59 për qind e qytetarëve mendojnë se situata ekonomike në vend është “e keqe” ose “shumë e keqe”, ndërsa besojnë se ka rënie krahasuar me një vit më parë. Megjithatë, një pjesë e qytetarëve janë optimistë për ringritjen e ekonomisë në vitin e ardhshëm, ku 35 për qind besojnë tek përmirësimi, përkundrejt 28 për qind që besojnë se ekonomia do të përkeqësohet.