Duke përkujtuar 80-vjetorin e lindjes së aktorit Bekim Fehmiu, kryeministri shqiptar dhe ai serb bënë thirrje për vazhdimësi të pajtimit shqiptaro-serb.
Kryeministri shqiptar Edi Rama dhe homologu i tij serb, Aleksandër Vuçiç lëshuan të mërkurën një deklaratë të përbashkët për shtyp duke përkujtuar jetën dhe trashëgiminë e Bekim Fehmiut, aktorit të famshëm të skenës jugosllave me origjinë shqiptare.
Deklarata përkujton 80-vjetorin e lindjes së aktorit që kreu vetëvrasje në qershor 2010 në Beograd. Dy kryeministrat thanë se ata e konsiderojnë Fehmiun një artist dhe humanist të madh dhe shprehën konsideratë të lartë për punën e tij.
Duke kujtuar jetën dhe karrierën e Fehmiut, dy liderët thanë se ajo tregonte se komunikimet e mira mes shqiptarëve dhe serbëve janë të mundura – dhe të rëndësishme për hir të brezave të ardhshëm.
“Bekim Fehmiu la një gjurmë të jashtëzakonshme te shqiptarët dhe serbët. Jeta dhe arti i tij dështmon se ne mund të komunikojmë, të kuptojmë dhe të mësojmë nga njëri-tjetri. Jeta dhe arti i tij tregojnë se ne mund të gjejmë lumturi në bashkëjetesë… dhe mund të ndërtojmë një të ardhme të begatë për brezat e ardhshëm,” shkruhej në deklaratën e përbashkët.
Fehmiu lindi në Sarajevë të Bosnjës më 1 qershor 1936, në një familje me etni shqiptare që më vonë u zhvendos në Shkodër dhe pastaj në Prizren.
Pasi kaloi fëmijërinë dhe një pjesë të rinisë në Kosovë, ai studioi në Fakultetin e Arteve të Dramës në Beograd, duke u bërë një anëtar i Teatrit Jugosllav të Dramës.
Karriera e tij mori zhvillim me filmin e vitit 1967 “Kam takuar edhe ciganë të lumtur”, që fitoi dy çmime në Kanë dhe u nominua për një Oskar.
Fehmiu u bë një ikonë në Europë pasi luajti rolin e Odisesë në miniseritë e vitit 1968 “Odiseja”. Ai u përfshi në filmat e Hollivudit më pas, por pasioni i tij i vërtetë qëndroi te teatri.
Mesazhi i përbashkët nga dy kryeministrat shënon një tjetër fazë në një marrëdhënie që filloi kur Rama vizitoi Beogradin në nëntor 2014 pas dekadave të mungesës së shkëmbimit diplomatik në të tilla nivele.
Dy qeveritë tani po punojnë së bashku në iniciativa që lidhen me të rinjtë dhe bashkëpunimin artistik.
Më 24 maj, Vuçiç priti sopranon shqiptare të njohur botërisht, Inva Mula, pasi ajo performoi në Teatrin Kombëtar në Beograd në operën e Giacomo Puccinit, “La Boheme”.
Më 7 dhe 8 qershor, ndërkohë teatri kombëtar i Tiranës do të vërë në skenë prodhimin e regjisorit serb Miki Manojloviç, “Romeo dhe Zhulieta”, ku aktorët e Kosovës do të luajnë Romeon dhe Montagët ndërsa aktorët serbë do të luajnë Zhulietën dhe Kapuletët.
