Tatjana Djekanoviç, një qitëse 19-vjeçare nga Bosnja dhe atletja më e re e delegacionit të vendit të saj në Rio në gusht, thotë se është krenare të prezantojë vendin e saj pavarësisht mbështetjes modeste të shtetit.
Kjo nuk do të jetë një verë e qetë për 19-vjeçaren Tatjana Djekanoviç, nga qyteti qendror boshnjak Tesliç, pavarësisht se ka mbaruar provimet e shkollës së mesme disa javë më parë.
Në më pak se dy muaj, kjo qitëse me saktësi premtuese do të jetë atletja më e re që do t’i bashkohet delegacionit boshnjak që do të udhëtojë për në Lojërat Olimpike në Rio, që hapen më 5 gusht. Deri atëherë, asaj do t’i duhet të stërvitet shumë.
Ky lloj sakrifice nuk është asgjë e re për Tatjanën, i tha ajo BIRN.
Përshtatja e jetës personale me stërvitjen “gjithmonë ka qenë mjaft e vështirë për mua… në shkollë gjeja një kompromis me mësuesit e mi që të kisha kohë të mjaftueshme për t’u trajnuar… në fundjavë”, tha ajo.
“Ndërsa të gjithë miqtë e mi dilnin, unë shpesh udhëtoja për të marrë pjesë në turne të ndryshëm”, shtoi ajo.
Qitja me saktësi të lartë ka qenë gjithmonë një sport popullor në Tesliç, dhe praktikimi i tij ishte një vendim i natyrshëm për të, shpjegoi atletja, duke vënë në dukje se ka marrë rezultate të mira në gara: pasi u bë kampione në Bosnje, ajo fitoi medaljen e bronxit në kupën e organizuar në Kuvajt në janar 2015.
Kur Komiteti Olimpik Boshnjak konfirmoi zyrtarisht pjesëmarrjen e saj në Lojërat Olimpike në Rio majin e kaluar, ajo ishte mjaft e emocionuar.
“Ky ishte realizimi i një ëndrre… Unë vij nga një qytet vërtetë i vogël dhe unë jam shumë e lumtur që e kam arritur suksesin kaq shpejt,” tha ajo.
Tatjana si shumë atletë të rinj boshnjakë shpreh gjithashtu keqardhjen për mungesën e mbështetjes nga shteti, pavarësisht se është një nga pak atletet olimpike nga Bosnja.
“Është shumë zhgënjyese që autoritetet nuk mund të gjejnë disa mijëra marka për të mbështetur përgatitjet e mia për në Rio,” u ankua ajo, duke vënë në dukje se edhe komiteti olimpik, pavarësisht entuziazmit të tij, nuk kishte fonde për këtë qëllim.
Pavarësisht nga mungesa e mbështetjes prej shtetit, Tatjana është krenare që ka një shans për të përfaqësuar Bosnjen në Lojërat Olimpike në Rio. “Si atlete, ndihem krenare për vendin tim,” tha ajo.
“Por ka disa atletë të cilët mund të përfaqësojnë Bosnjën në Lojërat Olimpike… edhe në qoftë se nuk do të isha një prej tyre, ende do të thosha se ata duhet të marrin më shumë vëmendje dhe mbështetje,” shtoi ajo.
“Të gjithë këta njerëz kanë kaluar vështirësi për të arritur synimin e tyre, por ata nuk heqin dorë… ata janë një frymëzim për atletët e ardhshëm olimpikë të vendit tonë,” përfundoi ajo.