Kreditë overdraft të marra gjatë tetë viteve të fundit për pagesën e importeve të shtrenjta do të shlyhen nga KESH me një kredi të re prej 218 milionë eurosh nga BERZH, duke sjellë një kursim në interesat e paguara në gati 80 për qind.
Banka Europiane për Rindërtim dhe Zhvillim, BERZH, i akordoi së fundmi KESH një kredi prej 218 milionë eurosh me interes referencë euribor 6 mujor plus 1 për qind, për të shlyer kredi overdraft të marra nga bankat shqiptare përgjatë viteve të fundit, një lëvizje që pritet t’i kursejë KESH rreth 80 për qind të interesave që paguan aktualisht për këto kredi.
Kontrata e kredisë u nënshkrua nga KESH dhe Banka Europiane për Rindërtim dhe Zhvillim më 1 korrik dhe pritet të bëhet efektive së shpejti. Gjithashtu, qeveria shqiptare do të jetë garante e kredisë për llogari të KESH, gjë që do të thotë se në rast se KESH gjendet në pamundësi financiare, qeveria do të paguajë kredinë për llogari të KESH.
Aktualisht, KESH ka rreth 30 miliardë lekë kredi overdraft nëpër bankat shqiptare me interes mesatar prej rreth 4.7 për qind në vit për vitin 2015. Interesat e kredisë së re prej euribor 6 mujor plus 1 për qind bëjnë që shumica dërrmuese e interesave të kredive të shpëtohen. Euribor, norma mesatare e interesit të kredive ndërbankare në euro aktualisht është negative për shkak të politikës së interesave negative të zbatuar nga Banka Qendrore Europiane, por në kontratën e KESH me BERZH thuhet se për sa kohë Euribor është negativ, kjo do të interpretohet si zero në kontratë. Pavarësisht kësaj, interesi i kredisë së re, e cila do të duhet të shlyhet brenda 15 viteve të ardhëshme, është gati pesë herë më i ulët se sa interesat e kredive aktuale.
KESH është aktualisht kredimarrësi kryesor i sistemit bankar shqiptar dhe kreditë për KESH përbëjnë rreth 5 për qind të të gjitha kredive në Shqipëri. Transferimi i këtyre kredive nga bankat shqiptare te BERZH pritet të ketë pasoja zinxhir në sistemin bankar. Fitimet e bankave nga kreditë për KESH do të mungojnë dhe bankat do të kenë një sasi të konsiderueshme parash të lira. Nga ana tjetër, shlyerja e kredive të KESH mund të sjellë një rritje arithmetike të përqindjes së kredive të këqija për shkak se kreditë e KESH ishin të garantuara nga qeveria dhe rrjedhimisht binin te kategoria e kredive të mira.