Zyrtarët mjekoligjorë në Kosovë kanë filluar gërmimet në kampusin e Universitetit të Prishtinës pasi morën informacion se atje mund të jetë një varr masiv i kohës së luftës.
Kërkimi për trupat e varrosur në kampusin e Universitetit të Prishtinës filloi të mërkurën me urdhër të Prokurorisë Speciale të Kosovës dhe pritet të zgjasë për disa ditë.
Kërkimi filloi pasi dikush që jeton në afërsi të zonës i ka thënë autoriteteve të Kosovës se forcat serbe i kishin varrosur viktimat në lëndinën mes Kishës Ortodokse Serbe, që ndodhet në kampusin universitar dhe Bibliotekës Kombëtare.
Kreu i Komisionit të Personave të Zhdukur pranë qeverisë së Kosovës, Prenk Gjetaj, tha se zyrtarët serbë ishin informuar për gërmimet.
“Beogradi është informuar për kohën dhe vendin në mënyrë që të mund të marrë pjesë si në rastet e mëparshme. Shpresoj që ky bashkëpunim do të kontribuojë në zbutjen e tensioneve dhe në shmangien e politizimit të zonave ku ka dyshime”, tha Gjetaj.
Ai shtoi se kisha ortodokse serbe e kishte dhënë pëlqimin për gërmimet pranë Kishës së Shën Nikollës.
Ndërtimi i kishës filloi në vitet 1990, kur Sllobodan Millosheviçi ishte në pushtet në atë që ishte në atë kohë Jugosllavi, por puna ka mbetur e papërfunduar që nga lufta në vitin 1999.
Zëvendëskryeministri i Kosovës, Branimir Stojanoviç, që mori pjesë në gërmimet e së mërkurës, tha se kisha nuk duhet të shihet si një objekt politik.
“Ka pasur përpjekje për të thirrur këtë tempull “Kisha e Millosheviçit”, por kjo nuk ka qenë kurrë e vërtetë. Asnjë kishë mund t’i përkasë Millosheviçit apo ndonjë politikani tjetër”, tha Stojanoviç.
“Kjo kishë është ndërtuar për njerëzit që jetonin në rajonin e Prishtinës dhe të cilët ishin më të shumtë në numër nga sa janë tani”, tha Stojanoviç, duke iu referuar mijëra serbëve që u larguan nga Kosova pas vitit 1999.
Kisha ka hapur polemika në të kaluarën. Në shtator të vitit 2012, Universiteti i Prishtinës ka paditur kishën ortodokse serbe duke e akuzuar atë se ka zënë në mënyrë të paligjshme më shumë se katër hektarë tokë, ku ishte ndërtuar kisha. Asnjë vendim përfundimtar gjyqësor është lëshuar për këtë rast.
Deri më tani, varrezat masive që përmbajnë eshtrat e më shumë se 1000 shqiptarëve të Kosovës, të vrarë gjatë luftës, janë zbuluar në katër vende në Serbi – në një qendër stërvitore të policisë në rrethinat e Beogradit në Batajnicë, në Liqenin Perucac, në një qendër të policisë në Petrovo Selo dhe në guroren e Rudnicës pranë qytetit të Rashkës.
Rreth 1,670 persona rezultojnë ende të zhdukur pas përfundimit të luftës në Kosovë në vitin 1999.
Kërkimi i fundit për një varr të luftës që dyshohej se përmbante trupat e shqiptarëve të Kosovës, pranë qytetit jugor të Novi Pazarit në prill – u krye nga komisioni i të zhdukurve të Serbisë dhe Kosovës, si dhe nga prokuroria serbe e krimeve të luftës dhe misioni i BE-së sundimit të ligjit në Kosovë, EULEX, por dështoi të japë ndonjë rezultat.
