Policia largoi anëtarët e Partisë Autoktone Kroate të së Drejtës nga një monument i Luftës së Dytë Botërore ku ata kishin ngritur një tendë në përpjekje për të parandaluar një përkujtimore antifashiste.
Ditën e dielë në mëngjes policia largoi disa anëtarë të Partisë Autoktone Kroate të së Drejtës, A-HSP, nga monumenti antifashist i Luftës së Dytë Botërore pranë fshatit Srb në rajonin e Likës, në afërsi të kufirit me Bosnjën dhe Hercegovinën.
Të djathtët, të cilët ngritën një tendë pranë monumentit, shpresonin të parandalonin një përkujtimore më 27 korrik me rastin e 75 vjetorit të kryengritjes së antifashistëve kundër regjimit pro-nazist të Luftës së Dytë Botërore, Shtetit të Pavarur të Kroacisë.
Por pasi shkelën një afat të policisë për t’u larguar, oficerët e policisë e larguan tendën dhe morën me vete tetë nga dhjetë anëtarët e A-HSP-së që refuzuan të largoheshin. Shtatë prej tyre u liruan menjëherë pas kësaj.
Kryetari i A-HSP Drazen Kelemineç u gjobit me 700 euro për shkelje të rendit publik dhe ligjeve të kuvendit, si edhe u ndalua t’i afrohet monumentit për gjashtë muaj nga gjykata e magjistratëve në qytetin e Gracacit.
Kelemineç u vetë përfaqësua në gjykatë, duke pretenduar se gjyqtari i dha atij vetëm dy orë kohë për të punësuar një avokat, dhe e dënoi vendimin.
“Sigurisht që nuk jam i lumtur me vendimin, sepse ai u përshtat sipas dëshirave të policisë në mënyrë që unë të mos mund të vija dot në Srb më 27 korrik,” tha ai.
Kelemineç dhe partia e tij planifikonin të rrinin te monumenti për të mos lejuar shoqatën e Këshillit Kombëtar Serb dhe shoqatën Antifashistët Kroatë të përkujtonin kryengritjen e vitit 1941 kundër regjimit pro-nazist të kohës së luftës.
Gjatë 6 viteve të fundit, A-HSP ka organizuar protesta gjatë përkujtimores, duke pretenduar se ajo është një “përkujtimore çetnike” dhe duhet të ndalohet.
Gjatë kryengritjes së vitit 1941 dhe në muajt para saj, popullsia vendase, shumica e tyre serbëve të Kroacisë dhe Bosnjës, u rebeluan kundër regjimit pasi ndaj serbëve u kryen krime të shumta nga ana e e njësive fashiste Ustashe në rajon.
Deri në vitet 1990 kjo datëj festohej si Dita e Kryengritjes së Popullit Kroat, kur ajo u zëvendësua nga Dita e Luftës Antifashiste më 22 qershor, që përkujton përvjetorin e themelimit të një prej njësive të para antifashiste në pyllin e Brezovicës pranë qytetit të Sisakut në Kroacinë qendrore.
A-HSP-ja kundërshton përkujtimin në Srb sepse thotë se krimet e luftës janë kryer nga antifashistët kundër kroatëve vendas gjatë kryengritjes.
Megjithatë policia tha se partia nuk mori dot leje për të përdorur vendin për protestën.
Policia fillimisht tha se tenda duhej të zhvendosej të martën e kaluar, por aktivistët e A-HSP e zhvendosën atë vetëm dhjetë metra.
Partia gjithashtu paralajmëroi policinë të mos përpiqej ta hiqte tendën me forcë “sepse mund të ‘ndizte një shkrepëse’ e të krijonte probleme që s’i dëshiron askush”.
Të njëjtën ditë, disa banorë të Srb i dërguan një letër të hapur autoriteteve kroate duke i bërë thirrje “të gjitha institucioneve dhe anëtarëve të shquar të shoqërisë tonë që të na mbrojnë dhe të mbështesin kujtimin e rezistencës kundër regjimit të Ustasheve”.
