Kompania Bankers Petroleum ka njoftuar një shtyrje të transaksionit të shitjes së aksioneve të saj tek fondi i ivestimeve kinez Geo-Gade deri më 30 shtator, në pritje të miratimit të marrëveshjes nga autoritetet kineze.
“Përfundimi i transaksionit mbetet ende subjekt i miratimit nga Administrata Shtetërore Kineze e Këmbimit Valutor (SAFE),” tha Bankers nëpërmjet në një njoftim për shtyp të hënën.
“Kundrejt kësaj shtyrje, Geo-Jade ka rënë dakord se nëse SAFE nuk e miraton marrëveshjen deri më 30 Shtator, 2016 Bankers ka të drejtë të marrë 20 milionë USD si tarifë terminimi nëse Bankers vendos të mbyllë marrëveshjen si pasojë e mosmiratimit,” kompania kanadeze e naftës shtoi.
Sipas Bankers palët kanë rënë dakord për të shtyrë afatin e fundit për transaksionin deri në 31 Tetor, 2016, në mënyrë që të kenë kohën e nevojshme për të mbyllur këtë proces, por në rrethana të caktuara ky afat mund të shkurtohet në 30 Shtator 2016.
Bankers Petroluem, kompania më e madhe e naftës në Shqipëri dhe njëkohësisht investitori më i madh i huaj në vend, njoftoi me 20 mars se kishte arritur një marrëveshje për shtijen 100% të aksioneve të saj për 2.2 dollarë kanadeze secili, për një shumë total prej 575 milionë dollarësh.
Çmimi i shtijes i rënë dakord me kompaninë kineze ishte sa dyfishi i vlerës së aksioneve të Bankers në bursën e Torontos në datën kur marrëveshje u shpall.
“Ky transaksion do të gjenerojë një përfitim të rëndësishëm ekonomik për Shqipërinë dhe për komunitetet lokale ku operon Bankers,” u shpreh pas shpalljes së marrëveshjes në 20 mars David French, president dhe drejtor ekzekutiv i Bankers Petroluem.
“Ne presim me padurim për të punuar me investitorët e rinj për të përfituar prej mundësive të ofruara nga asetet,” ai përfundoi.
