Vetëm disa ditë përpara fillimit të festivalit të dokumentarit dhe filmit të shkurtër të Prizrenit, organizatorët e Dokufest thonë se ndërsa autoritetet në Kosovë pretendojnë të ndihmojnë, ata nuk kanë dhënë akoma asnjë qindarkë.
Organizatorët e Dokufest, duke prezantuar programin e plotë të festivalit të hënën, i cili do të mbahet nga 5 deri në 13 gusht në Prizren, thonë se festivali i këtij viti do të mbahet pa asnjë ndihmë nga shteti.
Ministria e Kulturës së Kosovës, financuesja më e madhe e festivalit, ofroi 30,000 euro që do të mbulonin 20 për qind të shpenzimeve totale.
Por Eroll Bilibani, drejtor ekzekutiv i Dokufest, thotë se ata nuk kanë marrë asnjë financim nga ministria.
“Institucionet e Kosovës e shfrytëzojnë çdo mundësi për të përmendur se sa krenarë janë për Dokufest. Por për fat të keq këtë vit nuk morëm asnjë mbëshetje nga asnjë ministri – Komuna e Prizrenit dhe Ministria e Kulturës nuk kanë transferuar ende asnjë fond,” tha Bilibani.
Ministria e Kulturës dhe Komuna e Prizrenit nuk iu përgjigjën pyetjeve të BIRN rreth vonesës.
Megjithatë, festivali do të vazhdojë, thonë organizatorët dhe do të ketë një numër të madh policësh dhe autoritetesh të sigurisë që do të monitorojnë çdo pikë ku do të mbahet festivali.
Drejtoresha e Dokufest Nita Deda tha se po bëhet gjithçka për të shënjuar sërish Prizrenin si një qytet i rëndësishëm në hartën kulturore.
“Këtë vit patëm një numër rekord aplikimesh në filma. Përzgjodhëm 238 nga 5000 filma që aplikuan. Kjo e bën këtë programin më të madh dhe më cilësor të festivalit,” tha Deda.
“Korrupsioni” është çështja kryesore dhe slogani i këtij edicioni dhe pasojat e tij shoqërore do të analizohen në filma, diskutime dhe trajnime me kinematografë vendas dhe të huaj, si dhe me ekspertë.
Drejtori artistik i festivalit, Veton Nurkollari tha se përveç kategorive të zakonshme në garë, një kategori e re do t’i dedikohet regjisorëve të filmave që vdiqën vitin e shkuar.
“Dy nga filmat më të njohur të regjisorit iranian Abbas Kiarostami “Shija e Qershisë” dhe “Afër” do të shfaqen për nder të këtij artisti, ndërsa për nder të regjisores belge Chantal Akerman do të jepet premiera botërore e një interviste që ajo dha në prishtinë një vit përpara se të vdiste,” tha Nurkollari.
Do të ketë 10 premiera kombëtare që përzgjedhësi i programit të filmave të shkurtër Samir Karahoda tha se janë shumë të rëndësishme për festivalin.
Karahoda shtoi se “Shtëpia”, një bashkëprodhim i Dokufest, që është nominuar tashmë për çmime e Akademisë Europiane të Filmit, do të shfaqet.
Muzikantë të njohur do të jenë gjithashtu pjesë e programit DokuNight.
Omar Souleyman nga Siria do të hapë koncertin e festivalit ndërsa këngëtarja libaneze Yasmine Hamdan do të performojë në natën e fundit, duke ia dedikuar arin e saj të dashuruarve.
