Maqedonia po mban një ditë zi për 21 personat që humbën jetën gjatë stuhisë katastrofike me shi të dendur dhe erëra të fuqishme, që përfshiu Shkupin të shtunën në mbrëmje.
Teksa përpjekjet e shpëtimit vazhdojnë në disa nga fshatrave më të goditura pranë Shkupit të hënën në mëngjes, autoritetet konfirmuan se të paktën 21 persona vdiqën në stuhinë e rëndë të së shtunës dhe thanë se po kërkonin për të tjerë persona të zhdukur.
Shumica e viktimave vdiqën në periferi të kryeqytetit në fshatrat Stajkovci, Singeliç, Smilkovci dhe Aracinovo, ku uji rrëmbeu makinat në rrugë dhe përmbyti e shkatërroi shtëpitë.
“Kjo është e tmerrshme. Ne patëm vetëm një minutë e gjysmë kohë për të dalë jashtë [nga shtëpia] dhe për të shpëtuar veten kur uji vërshoi,” tha një banor i Stajkovcit për Telma TV.
“I shpëtuam vdekjes për pak. Uji ishte thuajse dy metra i thellë. Nuk kam parë kurrë një mot të tillë,” tha banori.
Shumë banorë nga këto zona, shtëpitë e të cilëve u përmbytën e kaluan natën e të dielës jashtë fshatrave të tyre, në shtëpitë e të afërmve ose në shkollat fillore që u kthyen në streha të përkohshme. Shumë të tjerë u larguan nga frika se moti i keq do të vazhdonte.
Spitalet raportuan të paktën 100 persona të plagosur nga stuhia. Njëzet e dy prej tyre u plagosën më rëndë dhe u mbajtën në spital.
Ndërkohë, banorët e Shkupit përdorën rrjetet sociale për të organizuar donacionet e ujit të pijshëm, ushqimit dhe furnizimeve ushqimore për viktimat që më pas iu dorëzuan Kryqit të Kuq, që dërgoi skuadra në zonat e prekura.
Presidenti Gjorge Ivanov, Kryeministri Emil Dimitriev dhe kryebashkiaku i Shkupit Koce Trajanovski vizituan fshatrat e prekura më tepër të dielën.
Autoritetet kundërshtuan kritikat nga disa banorë vendas dhe media, që pretenduan se bllokimi i kanaleve kulluese dhe një përgjigje e ngadaltë nga zyrtarët e përkeqësuan situatën.
“Le të përqendrohemi tani në ofrimin e ndihmës për ata që u goditën më rëndë, duke u ofruar ndihmë dhe strehim atyre që kanë nevojë,” tha zv. kryeministri Nikola Todorov të dielën.
Kryebashkiaku i Shkupit Koce Trajanovski gjithashtu mohoi të kishte faj në ndonjë rrethanë.
“Nuk ndjej përgjegjësi, vetëm pikëllim. Sasia e shiut që goditi disa zona të caktuara në një kohë të shkurtër ishte dërrmuese dhe nuk kishte mënyrë për ta parandaluar,” tha Trajanovski në media.
Stuhia gjithashtu goditi komunën veri-perëndimore të Tetovës, ku ujërat shkaktuan rrëshkitje toke në disa fshatra malore dhe ndërprenë rrugën Shikovicë dhe Brodec.
Shiu vazhdoi fuqishëm të shtunën në mbrëmje me erëra që frynin me shpejtësi 72-80 kilometra në orë.
Stuhia ndërpreu trafikun e autostradës Gostivar, Tetor dhe Shkup dhe gjithashtu shkaktoi trafik në unazën e Shkupit.
Shërbimi hidro-meteorologjik raportoi se reshjet më të mëdha të shtunën u matën në Shkup, 93 litra për metër katror.