Pasi Majlinda Kelmendi fitoi një medalje ari në xhudo në Rio, liderët e vendit, ashtu sikurse edhe mijëra njerëz të tjerë, iu drejtuan mediave sociale për të shprehur krenarinë e tyre për atleten e Kosovës.
Majlinda Kelmendi bëri histori të dielën në mbrëmje pasi u bë e para atlete e Kosovës që fitoi një medalje të artë në Lojërat e para Olimpike të vendit në Rio, Brazil.
Pas fitores, mbështetësit e skuadrës kombëtare të Kosovës vlerësuan në median sociale fitoren e Kelmendit duke e quajtur atë “Vajza e Artë e Kosovës”, “Krenaria e Artë”, “MyLinda”.
Pas fitores së saj, Kelmendi, dy herë kampione bote, derdhi lot ndërsa mori medaljen, duke deklaruar se kishte jetuar për këtë çast në katër vitet e fundit.
“Kjo do të thotë shumë. Njerëzit, veçanërisht fëmijët, në Kosovë më shohin si heroinë. Sapo i provova atyre se edhe pas luftës, edhe pasi i mbijetuam një lufte, nëse duan diçka, mund ta kenë,” tha ajo.
“Nëse duan të jenë kampionë olimpikë, mund të jenë. Edhe pse ne vijmë nga një vend i vogël, një vend i varfër,” shtoi Kelmendi pasi mori medaljen.
Driton Kuka, trajneri i Kelmendit, shkroi në Facebook: “Sakrifica u shpërblye. Lotët më të bukur të jetës sime.”
Presidenti i Kosovës, Hashim Thaçi, që ishte në Rio duke e parë Kelmendin live, gjithashtu shfaqi krenarinë e tij në Facebook.
“Majlinda personifikon një histori të re të sportit dhe suksesit ndërkombëtar të Kosovës. Me këtë fitore, Majlinda shënon ipon për politikën e jashtme të Kosovës,” shkroi Thaçi.
Isa Mustafa, kryeministri i Kosovës, gjithashtu e vlerësoi suksesin e Kelmendit. “Atë që shumë vende kanë dështuar ta bëjnë në dekada pjesëmarrje në Lojërat Olimpike, Kosova jonë e dashur, me heroinën brilante të saj, Majlinda Kelmendin, e bëri në Olimpiadën e parë,” shkroi Mustafa.
Dueli final i Kelmendit ishte me italianen Odette Giuffrida, pasi fitoi tre përballje të tjera të dielën.
Pas fitores së kampionateve botërore dhe europiane në xhudo, Klemendit u mungonte vetëm kjo medalje.
Kelmendi fitoi Kampionatin Europian të Xhudos në Rusi në prill. Kjo fitore u pa edhe si diplomatike, pasi ajo bindi Rusinë, një kundërshtare e fortë e pavarësisë së Kosovës, të luajë himnin kombëtar të Kosovës, – që krijoi disa polemika.
Katër vite më parë, në Lojërat Olimpike të Londrës 2012, Klemendi konkurroi nën flamurin shqiptar. Këtë vit, ajo ishte bartësja e flamurit të Kosovës në Paradën e Kombeve gjatë Ceremonisë Hapëse të së premtes në mbrëmje në Rio.
Rio është olimpiada e parë ku atletët e Kosovës po konkurrojnë me flamurin e tyre, pasi Kosova u pranua si anëtare e Komunitetit Olimpike në 2014.
Kelmendi u shfaq në dokumentarin e BIRN në 2006 “A ka ndonjëri një plan?”. Filmi përqendrohet në dilemat me të cilat përballen 17 njerëz nga Kosova, Serbia dhe vendet fqinje para negociatave finale të statusit.
Fotogaleri
