Mourad Hamyd, kunati i Cherif Kouachi – i cili vrau 12 persona të lidhur me revistën satirike franceze Charlie Hebdo vitin e shkuar – do të dalë përpara një gjykate bullgare si i dyshuar për plane për t’iu bashkuar ISIS.
Ministrja e brendshme bullgare Roumyana Buchvarova ka konfirmuar se Hamyd do të dalë para një gjykate bullgare më 9 gusht, i akuzuar për synimet që të bëhej një luftëtar i ISIS, raportoi media bullgare.
Buchvarova tha se Hamyd ishte arrestuar për shkak se kishte shfaqur sjellje tipike të “një luftëtari të ardhshëm për vendet e huaja”. Ajo nuk e zbuloi se ku ndodhej Hamyd dhe në cilën gjykatë do të zhvillohej seanca e tij.
Kunati 20-vjeçar i sulmuesit islamik të Parisit Cherif Kouachi u kap në kufirin bullgaro-turk në fund të korrikut. Familja e tij në Francë e raportoi atë të zhdukur më 25 korrik.
Lajmet në media sqaruan se ai nuk ishte i armatosur kur u ndalua në Turqi, megjithëse kishte veshje luftarake, dorashka dhe çizme në çantën e udhëtimit.
Materialet e telefonit dhe laptopit të tij, të cilat iu gjetën në çantën e shpinës, po ashtu kanë treguar për synimin e tij për t’u bashkuar organizatës terroriste islamike, thanë burimet franceze të zbulimit për gazetën Journal du Dimanche.
Hamyd u vu në qendër të vëmendjes janarin e kaluar, kur u shpall si një i dyshuar kryesor në sulmin ndaj Charlie Hebdo disa orë pasi dy vëllezërit, Said dhe Cherif Kouachi vranë 12 persona dhe plagosën 11 të tjerë gjatë një sulmi ndaj revistës satirike në Paris. Policia besonte se ai ishte shoferi që i largoi nga vendngjarja.
Ai më pas u dorëzua në polici në qytetin e tij të banimit Charleville-Mézières në Francë, duke ofruar një alibi. Hamyd gjithashtu tha se nuk donte të lidhej me “këto krime barbare” , duke pretenduar se ai kishte vetëm marrëdhënie të largët me motrën e tij të madhe dhe bashkëshortin e saj.
Ndërsa ishte në hetim, miqtë e Hamyd nisën një fushatë në median sociale nën hashtagun #MouradHamydInnocent (Mourad Hamyd i pafajshëm) dhe konfirmuan alibinë e tij duke thënë se Hamyd, që në atë kohë ishte adoleshent, ishte në shkollë kur ndodhën sulmet.
Të gjitha akuzat ndaj tij u rrëzuan dhe ai u lirua.
Megjithëse akuzat për terrorizmin u rrëzuan, Hamyd qëndroi në listën franceze të vëzhgimit të terroristëve.
