Dhjetëra qytetarë dhe aktivistë protestuan të enjten përpara godinës së parlamentit, ku po diskutohet ligji i importit të mbetjeve dhe i kërkuan qeverisë të mos votojë ligjin që e cilësuan si “mafioz”.
Përfshirja e ligjit të importit të mbetjeve në rendin e ditës në parlament shkaktoi trazira jashtë godinës së seancave plenare të Kuvendit, ku dhjetëra qytetarë nga shoqëria civile dhe aktivistë mjedisorë i kërkuan deputetëve të mos e votojnë ligjin “shkatërrimtar për mjedisin dhe shëndetin”.
Aktivistët e hodhën poshtë iniciativën ligjore të Partisë Socialiste për importimin e mbetjeve duke e quajtur atë një veprim që lidhet ngushtë me interesat mafioze dhe që synon ta kthejë Shqipërinë në një kosh plehrash.
Protestuesit argumentuan se vendi ka një shkallë të lartë ndotjeje të shkaktuar nga paaftësia në menaxhimin e mbetjeve urbane kombëtare dhe i kërkuan deputetëve në parlament të dëgjojnë zërin e tyre dhe të mos e votojnë ligjin e importit të mbetjeve.
“Aleanca Kundër Importit të Plehrave deklaron se lejimi i importit të plehrave që pritet të shqyrtohet sot në Kuvendin e Shqipërisë është një akt tradhtie ndaj interesave të popullit shqiptar, një pabesi politike ndaj votuesve dhe një akt që synon ta kthejë Shqipërinë në një kosh plehrash të Europës” u shpreh AKIP në një deklaratë për shtyp.
“…Me nismën për importin e plehrave, AKIP vlerëson se maxhoranca qeverisëse aktuale është kthyer në një organizatë që përfaqëson vetëm interesat e një grupi të vockël biznesmenësh dhe nuk përfaqëson më popullin shqiptar”, thanë aktivistët.
Ndërkohë brenda parlamentit pozita dhe opozita shkëmbyen akuza për miratimin e ligjit të mbetjeve.
Kryeministri Rama mbrojti ligjin nga foltorja e parlamentit duke e konsideruar atë si stimul për industrinë e riciklimit dhe lajmëroi se qeveria pritet të heqë taksën prej 50 lekësh/kg për mbetjet plastike të brendshme.
“Ligji stimulon zhvillimin e një industrie që sot e ka të domosdoshme importin e objekteve të listës së gjelbër. Nëse ne nuk do të bënim këtë ndërhyrje do të falimentonim industrinë e riciklimit, do të linim rrugëve 1.200 punonjës, nuk do të ishim në pajtim me direktivën europiane dhe do të mbyllnim një front punësimi dhe pastrimi mjedisor”, u shpreh Rama.
“Po flasim për një industri që në 3 vitet e fundit ka kryer investime serioze në infrastrukturën e vetë. Shqipëria ka fabrika të riciklimit të certifikuara nga Bashkimi Europian”, shtoi ai.
Tre deputetë të PS dhe LSI, Shalsi, Bushati dhe Derveni propozuan në korrik rikthimin e importit të mbetjeve me arsyetimin se “nxit industrinë e riciklimit në vend dhe krijon mijëra vende të reja pune”.
Partia Demokratike, e cila në vitin 2011 kërkoi të vërë në lëvizje një ligj të ngjashëm për importin e mbetjeve ka ruajtur një retorikë të kujdesshme, ndërsa deputeti demokrat Genc Ruli u shpreh në komisionin parlamentar të së mërkurës se “ligji i mëparshëm i mbetjeve ishte shumë i mirë” përpara se të ndryshohej nga qeveria socialiste.
Në seancën parlamentare të së enjtes, deputetja e opozitës, Jorida Tabaku e akuzoi qeverinë Rama vetëm për shkelje të premtimeve elektorale kur deputetët e Partisë Socialiste kundërshtonin ligjin.
Jashtë parlamentit, protestuesit u përplasën me policinë ndërsa u përpoqën të fusin në parlament një kosh plehrash me thirrjet “Jo plehrat në Shqipëri”.
“Edhe nëse ligji miratohet, ne do t’i drejtohemi presidentit që ta bllokojë atë. Gjithashtu do të kërkojmë mendimin e specialistëve të Konventës së Aarhusit, e cila e bën të detyrueshme pjesëmarrjen e komuniteteve të prekura në vendimmarrje” tha për BIRN, Andi Tepelena nga Aleanca Kundër Importit të Plehrave.
“Gjithashtu do të fillojmë menjëherë mbledhjen e firmave të nevojshme për referendumin kundër këtij ligji”, shtoi ai.
Protestuesit lajmëruan vazhdimin e tubimit jashtë parlamentit në orën 17:30 kohë kur pritet që parlamenti të votojë ndryshimet ligjore.
