Një nga dhjetë bullgarë vuajtën nga dhuna në familje dhe dhuna me bazë gjinore vitin e shkuar, ku nivelet ishin më të larta te popullata rome e vendit, thotë një studim i ri.
Një e treta e shtetasve bullgarë pranojnë të kenë vuajtur nga dhuna në familje apo dhuna me bazë gjinore, të paktën një herë në jetë, ku më tepër se një në dhjetë persona kanë rënë viktimë vitin e shkuar, sipas Studimit Kombëtar mbi Dhunën në Familje dhe atë Gjinore në Bullgari, të publikuar të martën.
Studimi, i kryer nga Fondacioni Partnerët e Bullgarisë, Akademia e të Drejtave të Njeriut në Norvegji dhe Qendra për Studim të Demokracisë në Sofje gjatë 14 muajve të fundit, paralajmëroi se shifrat e vlerësuara mund të jenë edhe më të larta, për shkak se mungesa e ulët e ndërgjegjësimit sjell më pak raportime, turp dhe mospranim social të diskutimit rreth eksperiencave të tilla në Bullgari.
“Nivelet e mungesës së ndërgjegjësimit dhe nënvlerësimi i dhunës në familje dhe asaj gjinore janë të larta. Shkalla e nënvlerësimit është më e lartë kur përfshihen burrat dhe fëmijët,” tha autorja e studimit Slavyanka Ivanova.
Ivanova tha se një tjetër problem ishte toleranca e publikut ndaj fenomeneve të tilla dhe madje mbështetja për akte dhune ndaj personave LGBT apo nga gratë kundrejt burrave.
Viktimat më të zakonshme të abuzimit seksual apo dhunës në familje në Bullgari mbeten gratë.
Mbi 11 për qind e grave që morën pjesë në studim pranuan se kishin vuajtur forma të dhunës me bazë gjinore apo seksuale, brenda dhe jashtë shtëpive.
Mes grave rome në Bullgari, numri i viktimave u rrit në 17.8 për qind.
“Është shumë më e vështirë për vajzat rome të marrin mbështetje, për shkak të nivelit të lartë të përjashtimit social dhe diskriminimit [ndaj romëve në shoqërinë bullgare],” tha Ivanova.
Studimi citon punonjës në qendrat e krizës që pohojnë se pavarësisht nga vështirësitë në marrjen e ndihmës sociale, gratë rome janë më të gatshme të raportojnë dhunën në familje.
Studimi gjithashtu paralajmëroi rreth nivelit të lartë të abuzimit të përsëritur të viktimave në familje në Bullgari.
Niveli arriti 20 për qind te burrat bullgarë që pranuan se ishin subjekt i formave të tilla të dhunës dhe mbi 30 për qind te gratë, ndërsa te gratë rome përqindja shkoi mbi 50.
Sipas viktimave të dhunës dhe punonjësve socialë që morën pjesë në studim, në shumicën e rasteve të abuzimit të përsëritur apo sistematik, viktimat kanë kërkuar ndihmë nga institucionet shtetërore, që kanë dështuar t’i mbrojnë ata.
Mungesa e mbështetjes së duhur institucionale shpesh zhdekurajojnë viktimat nga raportimi i rasteve të tjera të abuzimit, thotë studimi.
Në raport thuhet se nënshkrimi i Konventës së Veprimit të Stambollit nga ana e Bullgarisë, kundër grave është një hap i rëndësishëm përpara.
Njëkohësisht, ai rekomandoi që autoritetet bullgare të rrisin përpjekjet e tyre në terren për parandalimin dhe mbështetjen e vazhdueshme të viktimave të abuzimit në familje, pasi largohen nga qendrat shtetërore të krizës.