Presidenti Nishani u takua me një grup aktivistësh që kundërshtojnë importin e plehrave në Shqipëri dhe premtoi se do të marrë vendim për kthimin apo jo të ligjit pasi të takohet me një përfaqësi të ricikluesve ndërsa paralelisht, kryeministri Edi Rama diskutoi pa shumë rezultat idenë për një plan kombëtar pastrimi.
Një përfaqësi qytetarësh nga Aleanca Kundër Importit të Plehrave dhe organizata e grupime të tjera u takuan sot (7 tetor) me Presidentin e Republikës Bujar Nishani, ku qytetarët i kërkuan presidentit rikthimin për shqyrtim në Kuvendin e Shqipërisë të ligjit 92/2016 “Për Disa Shtesa dhe Ndryshime në Ligjin 10 463 Për Menaxhimin e Integruar të Mbetjeve”, me argumentin se ligji i miratuar në Kuvendin e Shqipërisë më 22 shtator nuk ka ndjekur procedurat e duhura të konsultimit publik dhe se bie ndesh me interesin e popullit shqiptar për një mjedis të pastër.
Paralelisht, kryeministri Edi Rama zhvilloi një takim me një pjesë të kryetarëve të bashkive si dhe me përfaqësues të Shoqatës së Ricikluesve, një grup kompanish që punojnë në sektorin e riciklimit të mbetjeve urbane.
Rama përsëriti edhe një herë qëndrimin e tij në mbrojtje të ligjit të miratuar duke argumentuar se ligji i ri do të shpëtojë nga falimenti industrinë e riciklimit. “Industria e Riciklimit është në një moment dramatik,” tha Rama. “Ajo ose duhet të pranojë fundin e ekzistencës së vet në Shqipëri duke shpallur falimentin ose duke u zhvendosur në vende të tjera të rajonit, ose të marrë frymë dhe të jetë motori i këtij procesi që nuk mund të ketë asnjë shans suksesi pa këtë industri.”
Takimi i Ramës me kryebashkiakët dhe ricikluesit qe supozuar se do të shërbente për të krijuar një plan kombëtar për pastrimin e vendit dhe për menaxhimin e mbetjeve urbane siç duhet. Në fjalën e tij, Rama tha se kishte krijuar një zyrë pranë kryeministrit për këtë punë. Por nuk është e qartë nëse një plan i tillë ekziston me të vërtetë apo është funksional për të zgjidhur problemin që shumë qeveri në të shkuarën kanë premtuar se do ta zgjidhin, duke e lënë vendin pas efektivisht më të ndotur nga sa e gjetën. Rama nga ana e tij theksoi se sipas mendimit të tij, Shqipëria sot është më e pastër nga sa ka qenë në ditën kur ai mori postin e kryeministrit, por nuk dha ndonjë referencë se ku e bazonte këtë konkluzion.
Presidenti Nishani, nga ana e tij dëgjoi argumentet e aktivistëve, të cilët theksuan se ligji për menaxhimin e mbetjeve ka humbur funksionin e vet bazë.
“Ju drejtohemi ju pasi jemi në një hall të madh, prej vitit 2004 AKIP ka sprapsur disa tentativa për hapjen e rrugës për importin e mbetjeve. Ligji [për menaxhimin e mbetjeve urbane] ka synim të mbrojë jetën dhe shëndetin e qytetarëve, por ka nene që lejojnë importimin e mbetjeve,” tha në takim aktivistja e AKIP Kozara Kati.
“Qëllimi i ekzistencës së ligjit për menaxhimin e mbetjeve është që të mbrojë mjedisin,” argumentoi aktivistja Brizida Gjikondi, “por ky ligj po përdoret në fakt për interesa ekonomikë,” theksoi ajo duke vënë në dukje se, ndonëse ligji ka hyrë në fuqi në vitin 2011, menaxhimi i integruar i mbetjeve mbetet një ëndërr në Shqipëri ndërkohë që dy qeveri janë investuar në të shkuarën dhe në të tashmen, kundër vullnetit të qytetarëve dhe në mbështetje vetëm të neneve që lejojnë importin e mbetjeve.
Presidenti Nishani përgëzoi qytetarët për protestën e 1 tetorit duke argumentuar se, pavarësisht se cili është personi që qeveris vendin, Shqipëria ka nevojë për shoqëri civile.
“Zëri juaj si shoqëri civile më ka inspiruar dhe më ka dhënë shpresë. Jam i bindur që do ta fitoni kauzën tuaj”, shtoi presidenti duke theksuar se në raste të tilla zëri qytetar ka më tepër rëndësi se një firmë.
“Unë do ta trajtoj me seriozitet çështjen e shtuar prej jush. Do të punojmë me ekspertë për të, pasi për mua ka shumë rëndësi. Jam i obliguar të jem i integruar në mbrojtje të interesit publik… Për sa kohë do të jem në këtë zyrë, nuk do ta zhgënjen interesin publik që ju përfaqësoni”, u shpreh presidenti Nishani.
“Si qytetar dhe jo si President, ju kërkoj që të jeni persistentë në angazhimin publik,” tha Nishani.
Në fund, Nishani tha se do të marrë vendimin final për kthimin apo jo të ligjit për shqyrtim në Kuvendin e Shqipërisë pasi të konsultohet edhe me Shoqatën e Ricikluesve.
Nëse Nishani e kthen ligjin në parlament, dekreti i tij, Kuvendi do të duhet të miratojë dekretin dhe të rishqyrtojë ligjin ose ta rrëzojë dekretin e Presidentit me jo më pak se 71 vota. Balanca e votave në parlament në lidhje me këtë çështje është aktualisht e paqartë. Ligji u miratua me vetëm 63 vota, por një numër deputetësh nuk morën pjesë në votim pavarësisht se kishin shprehur qëndrimin e tyre pro, duke e lënë të hapur mundësinë që një dekret për kthimin e tij në kuvend, të mund të rrëzohet me 71 vota.