Kryeministri Edi Rama pritet të promovojë botimin në serbisht të librit të tij “Kurban” gjatë vizitës shtetërore në Serbi.
Kryeministri Edi Rama, i cili po viziton Serbinë për të marrë pjesë në forumet e biznesit dhe sigurisë që do të mbahen nga 13 deri në 14 tetor, gjithashtu do të prezantojë përkthimin në serbisht të librit të tij “Kurban” të enjten, në një hotel në Beograd.
Sipas shtëpisë botuese të Ramës në Serbi, Samizdat B92, kryeministri shqiptar do t’i drejtohet gjithashtu një audience në Beograd.
Veran Matiç, kryeredaktor i stacionit televiziv B92 me bazë në Beograd dhe drejtor i Samizdat B92, i tha BIRN se synimi i promovimit të “Kurban” ishte prezantimi i publikut serb me ngjarjet kulturore, politike dhe sociale në Shqipëri.
“Për shkak të ngjarjeve historike ka një mungesë të përkthimeve të librave nga Kosova dhe Shqipëria në Serbi,” tha Matiç, duke shtuar se Samizdat B92 tashmë ka përkthyer dhe publikuar disa autorë nga Kosova dhe Shqipëria.
Matiç tha se duhej bërë më shumë drejt pajtimit mes shqiptarëve dhe serbëve dhe se librat mund të ndihmojnë në këtë drejtim.
“Një mik i imi tha se ne [serbët dhe shqiptarët] jemi në frazën e brishtë të normalizimit pas të cilës duhet të vijë marrëdhënia e normalizimit të plotë. Vetëm atëherë mund të flasim për pajtim dhe miqësi mes serbëve dhe shqiptarëve, pavarësisht se ku jetojnë,” tha Matiç.
Matiç gjithashtu tha se Samizdat B92 po përgatit tre libra nga gazetari i Kosovës Veton Surroi që do të botohen në Serbi së shpejti.
Sipas këshilltarit të tij politik, shkrimtarit dhe publicistit Shkëlzen Maliqi “Kurban” u botua në vitin 2011 në Shqipëri pasi Rama humbi zgjedhjet për kryebashkiak të Tiranës.
Maliqi i tha të përditshmes serbe Danas në gusht se gjatë verës 2011, pasi Rama humbi zgjedhjet, ai vendosi të shkruajë një formë dëshmie mbi gjendjen në Shqipëri, duke shqyrtuar vizionin e tij të transformimit demokratik dhe modernizimit përballë asaj që ai e quajti vizion autoritar të rivalit të tij të atëhershëm ish-kryeministrit Sali Berisha.
