Zyra e kandidatit republikan amerikan, Donald Trump i hodhi poshtë pretendimet se ai i tha një media serbe në një intervistë se pendohej për sulmet ajrore të kryesuara nga SHBA ndaj Serbisë në vitin 1999.
Pasi e përjavshmja serbe Nedeljnik botoi atë që pretendoi se ishte një intervistë me kandidatin republikan për president në zgjedhjet amerikane, Donald Trump, në të cilën ai e quajti bombardimin e Serbisë nga NATO një gabim, zyra e tij të enjten tha se intervista ishte një mashtrim.
“Zoti Trump nuk dha kurrë një intervistë për të përjavshmen serbe Nedeljnik, siç u raportua në mënyrë të rreme nga Newsweek dhe një intervistë e tillë nuk u krye kurrë përmes Drejtores sonë në Shtetin Indiana. Ky është një mashtrim dhe ne presim të marrim falje publike prej të gjitha palëve të përfshira,” tha Jason Miller, këshilltari i lartë i komunikimit për Trump.
Bordi editorial i Nedeljnik ndërkohë lëshoi një deklaratë duke qartësuar se e kishte marrë intervistën përmes një shtetasi amerikan me origjinë serbe, Vladimir Rajçiç, që kisha marrë përgjigjet e disa pyetjeve nga Suzie Jaworowsi nga ekipi i Trump.
Deklarata gjithashtu përmbante një link për te emaili i dërguar prej saj në të cilën ai thoshte se Trump mendonte se “bombardimi i serbëve, që kane qenë aleatët tanë në të dyja luftërat botërore, ishte një gabim i madh. Serbët janë njerëz shumë të mirë. Për fat të keq, administrata Clinton i solli atyre shumë dëm, të gjithë Ballkanit, ku u krijua kaos”.
Nedeljnik ia atribuoi këto përgjigje vetë Trump.
Megjithatë, Jaworowski, Drejtoreshë e fushatës së Trump në Indiana këmbënguli se ajo nuk po fliste për Trump dhe se nuk ishte një “kanal” i kandidatit presidencial.
“Sa për artikullin për një intervistë për median me një politikan serb dhe zotin Trump përmes emailit tim, kjo është krejtësisht false. Unë nuk kam shërbyer kurrë si një ndërmjetëse për të intervistuar Trump për ndokënd,” tha Jaworowski në një deklaratë.
Vladimir Rajçiç, që thotë se ai kreu intervistë me ekipin e Trump, ndërkohë i ka qëndruar idesë se intervista ishte e vërtetë.
Sipas tij, intervista u ra dakord me Jaworowskin dhe Mike Pence, guvernatorin e Indianës dhe kandidatin republikan për zv.president.
Rajçiç pretendon se ekipi i Trump më vonë vendosi ta mohojë intervistën pasi media amerikane i lidhi deklaratat e tij me masakrën e Srebrenicës në 1995 në të cilën 7000 boshnjakë u vranë nga serbët e Bosnjës.
Shumë media dhe analistë në SHBA e kritikuan deklaratën e pretenduar të Trump rreth bombardimit në Jugosllavi, duke kujtuar se vendi në atë kohë drejtohej nga Sllobodan Millosheviç, i cili më vonë u akuzua për krime lufte dhe gjenocid.
Në qershor, zv presidenti amerikan Joseph Biden ofroi ngushëllimet e tij te familjet e viktimave të bombardimit të NATO-s në 1999 dhe bëri thirrje që Serbia dhe Kosova të zgjidhin problemet e tyre gjatë një vizite në Beograd. Megjithatë, ai nuk kërkoi ndjesë për vetë ndërhyrjen ushtarake.
“Kujtimet e humbjes së të dashurve janë ende të freskëta,” tha Biden. “Ngushëllimet e mia për familjet e atyre që humbën jetën gjatë luftërave të viteve 1990, përfshirë ata që humbën jetën në fushatën bombarduese të NATO-s”.