Statistikat e publikuara së fundmi për vendet e Bashkimit Europian tregojnë se obeziteti ka përfshirë më tepër se gjysmën e popullatës, ku mosha dhe niveli i arsimit ndikojnë në përkeqësimin e situatës.
Eurostat publikoi të enjten (20 tetor) të dhënat statistikore të shëndetit në Bashkimin Europian nga ku rezultoi se pothuajse 1 në 6 të rritur në BE konsiderohet si obez.
Sipas të dhënave të zyrës së BE-së për statistikat të cilat bëjnë fjalë për vitin 2014, me rritjen e moshës dhe uljen e nivelit të arsimimit, përqindja e obezitetit te të rriturit në vendet e Bashkimit Europian shtohet.
46.1% personave të moshës 18 vjeç e lart në BE kishin një peshë normale në vitin 2014, ndërsa më shumë se gjysma e të rriturve 51.6% konsideroheshin mbi peshë (35.7% para-obezë dhe 15.9% obezë) dhe 2.3% nën-peshë.
Obeziteti është një problem serioz i shëndetit që mund të matet statistikisht duke përdorur Indeksin e Masës Trupore (BMI sipas akronomit në anglisht) të të rrituve. Obeziteti konsiderohet në rastet kur BMI e kalon treguesin 30.
Statistikat e Eurostat sugjerojnë se me moshimin e popullatës rritet edhe numri i personave obezë, që ilustrohet te 22.1% e personave nga 65-74 vjeç krahasuar me 5.7% te ata të moshës 18-24 vjeç.
E njëjta gjë mund të thuhet për nivelin e arsimit: proporcioni i personave obezë në BE bie kur niveli i arsimit rritet. 11.5% e të rriturve me arsim të lartë janë obezë ndërsa e njëjta gjë mund të thuhet për 19.9% të personave me arsim të ulët.
Malta renditet si vendi me problemin më të madh të obezitetit në Bashkimin Europian (26% e popullatës) pasuar nga Estonia, Letonia, Hungaria dhe Mbretëria e Bashkuar.
Nga ana tjetër e spektrit Rumania konsiderohet si vendi më pak obez i BE-së (me vetëm 9.5% të të rriturve), ndjekur nga Italia, Holanda, Belgjika dhe Suedia.
Duke krahasuar gjinitë, diferenca e obezitetit te burrat dhe gratë qe e ulët në shumicën e vendeve europiane, ndërsa ishte e barabartë për të dyja gjinitë në Francë.
Të dhënat tregojnë se krahasuar me vitin 2008, obeziteti pësoi përkeqësim në Rumani, Letoni dhe Bullgari, ndërsa vendet që performuan më mirë ishin Sllovakia, Qipro dhe Republika Çeke.