Vendimi i Sllovenisë për të ngritur një barrierë të re kufitare me Kroacinë do të fuqizojë trafikimin e njerëzve dhe mund të çojë në më tepër dhunë, paralajmërojnë ekspertët e krizës së refugjatëve në Kroaci.
Vendimi i Sllovenisë për të ngritur panele metali dhe barriera të tjera në kufirin me Kroacinë, për të penguar valën e refugjatëve, do të rrisë trafikimin e njerëzve dhe do të çojë në dhunë, kanë paralajmëruar ekspertët kroatë.
“Duke pasur parasysh se BE-ja tani ka agjencinë e saj të kufirit dhe rojës bregdetare, që Bullgaria ka ushtrinë e saj në kufi dhe se Serbia ka mobilizuar më shumë njerëz për t’u dërguar në jug… ne mund të presim dhunë më të madhe nëse një numër më i madh njerëzish duan të kalojnë kufirin,” tha për BIRN Julija Kranjec, një aktiviste që punon në Qendrën për Studime Paqeje me bazë në Zagreb.
“Gjëra të tilla nuk mund të ndalojnë njerëzit nga kapërcimi i kufirit por mund të rrisë numrin e vdekjeve dhe dhunës, si dhe të zgjerojë rrjetin e trafikantëve të njerëzve,” theksoi ai.
Autoritetet sllovene kanë filluar të instalojnë panele metali në pikat kufitare me Kroacinë që nga e premtja e shkuar. Ministria e brendshme sllovene konfirmoi për BIRN se kishte instaluar tashmë 27.5 km të gardhit.
“Në ditët në vazhdim, Sllovenia do të përqendrohet te instalimi i barrierave teknike në disa nga zonat më të përdorura për të hyrë në vend vitin e shkuar,” deklaroi ministria.
“Këto masa të nevojshme dhe të përkohshme synojnë të mbështesin policinë sllovene në mbrojtjen efektive të kufirit të jashtëm Shengen në rast të një vale tjetër migracioni dhe për të ruajtur sigurinë e njerëzve,” përfundoi ministria.
Në vizitën e tij në Serbi të hënën, kryeministri serb Miro Cerar tha se vendi i tij synon të kontrollojë se kush mund të hyjë apo jo në Slloveni dhe në zonën Shengen”.
Ai paralajmëroi se nëse një valë e re refugjatësh mbërrin, ashtu si në vjeshtën e shkuar, sllovenia mund të imponojë një regjim më strikt vizash ndaj të ardhurve.
Drago Zuparic Iljic, nga Instituti për Migracionin dhe Studimet Etnike i tha BIRN se rrethimi i ri i kufirit “do të bllokonte disa persona që të mos hynin, por gjithashtu do të dëmtonte më shumë të tjerë”.
“Më e rëndësishmja është se përveç paneleve, Sllovenia mund të dërgojë ushtrinë e saj në kufi, duke e militarizuar më tej problemin. Skenari më i keq do të çonte në ngjarje si Bullgaria ku policia qëlloi refugjatët që po përpiqeshin të hynin nga Turqia”, paralajmëroi ai.
Sllovenia e ndryshoi ligjin e saj të mbrojtjes në tetor 2015 gjatë krizës së refugjatëve, duke lejuar dërgimin e ushtrisë në kufi për të parandaluar hyrjen e paligjshme të refugjatëve.
“E gjitha kjo forcon rrjetet e trafikantëve, që do të rrisin çmimet për kalimin e njerëzve në anën tjetër të kufirit”, theksoi Zuparic-Iljic.
Luka Juranic, nga OJQ-ja me bazë në Zagreb “E keni seriozisht?” që ndihmoi refugjatët e Lindjes së Mesme në Kroaci vjeshtën e shkuar, gjithashtu i sheh panelët e rinj si “një lëvizje apo mesazh politik”.
“Si panelët dhe telat me gjemba janë një akt politik. Në thelb nuk do të thotë asgjë… sepse trafikatët e dinë shumë mirë se si dhe ku mund të kalohet kufiri dhe është e qartë se jo i gjithë kufiri mund të mbrohet nga panelet apo telat,” tha ai për BIRN.
Juranic dhe Kranjec bien dakord se numri i refugjatëve që mbërrijnë në Kroaci nga Serbia është rritur por jo në mënyrë drastike.
Rreth 200 persona hyjnë në Kroaci çdo ditë nga Serbia. Rritja mund të shihet vetëm në kuptimin e azilkërkuesve.
Nga janari në fund të shtatorit, Kroacia regjistroi 1584 azilkërkues, shifër më e lartë sesa 211 azilkërkues në të gjithë 2015-ën.
“Kjo tregon diçka thelbësore – mosekzistencën e bashkëpunimit dhe koordinimit mes policisë kroate dhe serbe. Një vend do që të shpëtojë nga refugjatët, ndaj policia e tij i dërgon ata në kufi me vendin tjetër, ndërsa ky i fundit i kthen sërish,” përfundoi Juranic.