Korporata Elektroenergjetike Shqiptare bëri të ditur sot se niveli i liqeneve në Kaskadën e Drinit ka arritur pranë pikës maksimale shumëvjeçare, ndërsa pasdreke raportohet për fillimin e shkarkimeve në Vaun e Dejës, gjë që mund të shoqërohet me përmbytje të zonës së nën-Shkodrës.
Niveli i Liqenit të Fierzës në kaskadën e Drinit shënoi kuotën 288.76 metra mbi nivelin e detit të martën në orën 11 paradite, duke qenë 13.7 metra më shumë se sa mesatarja historike për muajin nëntor dhe vetëm 0.4 metra më pak se sa maksimumi historik i shënuar në vitin 1996.
Niveli i liqeneve të Komanit dhe Vaut të Dejës më poshtë rrjedhës së Drinit është aktualisht 173.05 dhe 75.44 metra mbi nivelin e detit duke qenë shumë pranë kuotave maksimale të lejuara.
“Në zbatim dhe rregullores dhe udhëzimeve të Sekretariatit Teknik të Komisionit të Posaçëm të Trajtimit të Plotave, Korporata Elektroenergjitike Shqiptare është duke menaxhuar situatën duke synuar mbajtën e kuotës në HEC Koman në 172.00 m ndërsa atë të HEC Vau Dejës jo më shumë se 75.00 m,” bëri të ditur KESH në një njoftim për shtyp.
Kjo do të thotë se rreziku i shkarkimeve masive nga Vau i Dejës është i lartë dhe po ashtu, edhe rreziku i përmbytjes së zonës së nën-Shkodrës, e cila ka pësuar përmbytje të konsiderueshme nga një situatë e ngjashme disa vite më parë.
Korporata ka ende 754 milionë lekë (rreth 5 milionë euro) detyrime të pashlyera ndaj banorëve për përmbytjet e viteve 2010 dhe 2011.
