Sipas censusit të publikuar të mërkurën nga Lëvizja Rinore Egjiptiane Rome, komuniteti egjiptian në Elbasan jeton në 66.3 për qind të rasteve nën standardin minimal të jetesës dhe përballet me një papunësi prej 87 për qind.
Lëvizja Rinore Egjiptiane Rome, një organizatë rinore që ka në fokus mbrojtjen dhe zhvillimin e komuniteteve egjiptiane dhe rome në Shqipëri, publikoi të mërkurën një studim të thelluar në formën e censusit mbi banesat dhe popullatën egjiptiane në Elbasan.
Censusi i mbështetur te vetëdeklarimi, realizoi gjatë muajit nëntor – janar 2015, 1,503 intervista në terren në bashkinë Elbasan dhe në 5 njësitë administrative të saj.
Sipas censusit të LRER, familjet e komunitetit egjiptian në Elbasan jetojnë në 66.3 për qind të rasteve me të ardhura nën nivelin minimal të pagës prej 22.000 lekë dhe janë të prekura thellësisht nga papunësia.
23.4 për qind e të intervistuarve kanë deklaruar se kanë të ardhura mujore familjare nga 15.001 deri në 20.000 lekë, 17.6 për qind kanë të ardhura nga 10.000 deri në 15.000 lekë, 15.4 për qind nga 5.000 deri në 10.000 lekë.
“Rezultatet e censusit tonë ofrojnë fakte reale për kontestimin e censusit zyrtar të qeverisë,” tha në prezantimin e hulumtimit Gentian Serjani kreu i Lëvizjes Rinore Egjiptiane Rome, duke iu referuar ndër të tjera shifrave kombëtare sipas të cilave në Shqipëri ka 3368 persona të komunitetit egjiptian, ndërsa vetëdeklarimi i Lëvizjes ka identifikuar 5661 persona vetëm për Elbasanin.
Papunësia dhe kushtet e këqija të jetesës mbeten problemet kryesore të komunitetit egjiptian në Elbasan sipas studimit.
Rreth 87.3 për qind e personave mbi 18 vjeç (3,389 individë) nuk janë të punësuar krahasuar me 13.7 për qind të atyre që kanë siguruar një punë.
Sipas Serjanit gjendja ekonomike e komunitetit egjiptian është përkeqësuar akoma më shumë nga skema pilot e ndihmës ekonomike të aplikuar edhe në Elbasan, e cila për shkak të kritereve të reja dhe zbatimit ka lënë jashtë ndihmës ekonomike shumë familje në varfëri ekstreme të cilat më parë e përfitonin ndihmën.
Censusi zbuloi se 9.7 për qind e komunitetit egjiptian nuk ka njohuri në shkrim dhe lexim, ndërsa mbi 85 për qind e tyre kanë përfunduar arsimin fillor dhe 9-vjeçar. Nga censusi rezulton se 11.4 për qind e tyre arsimin e mesëm dhe 3.2 për qind për atë të lartë.
Censusi analizon se papunësia dhe varfëria e komunitetit nuk është pasojë e kualifikimit profesional dhe arsimit, pasi të dhënat tregojnë se arsimi nuk ndikon pozitivisht në punësim te personat mbi 18 vjeç.
Sipas Censusit punësimi i komunitetit egjiptian në Elbasan është në shkallë 13.9 për qind, ku pesha më e madhe ndahet te ata me arsim të mesëm, 9-vjeçar dhe fillor. Vetëm 0.9 për qind e personave të komunitetit të cilët kanë mbaruar studimet e larta kanë siguruar një vend pune.
Sipas aktivistëve kualifikimi profesional i komunitetit mbetet në parametra pozitivë ku 34.3 për qind e tyre kanë një profesion të certifikuar, 6.8 për qind janë artizanë ndërsa 58.9 për qind kanë një formim profesional jo të certifikuar.
“Në shumë vende të botës dhe në Shqipëri, komuniteti rom dhe egjiptian përballet me shkelje të të drejtave të njeriut, si strehimi, edukimi dhe mbrojtja sociale. Duhet të merren masa të menjëhershme dhe ky census duhet të përdoret në këtë drejtim,” tha Birgitta Jansson, Këshilltare dhe Kreu i Bashkëpunimit për Zhvillim në Agjencinë Ndërkombëtare Suedeze të Zhvillimit.
“Çështja e komunitetit rom dhe egjiptian në Shqipëri kërkon vullnet politik dhe unë shpresoj që raport-progresi i sotëm të shërbejë si bazë për veprimet e qeverisë,” shtoi ajo.
Nga censusi rezulton se shumica e familjeve e komunitetit egjiptian në Elbasan jetojnë në banesa private 53.5 për qind dhe në 45.3 për qind në apartamente. Vetëm 60.6 për qind e tyre janë pronarë të ligjshëm të shtëpive.
Hulumtimi tregoi se kushtet shtëpiake të familjeve të komunitetit egjiptian në Elbasan janë të këqija, pasi lavatriçet, sobat e gatimit, dhe dushi zotëroheshin nga më pak se gjysma e familjeve.
Censusi “Banesat dhe popullata egjiptiane në Elbasan” u mbështet nga programi “Rritja e aksesit në liri dhe drejtësi në Shqipëri” i qeverisë suedeze, zbatuar nga Civil Rights Defenders.
