Kryeministri bullgar Boyko Borissov do të japë dorëheqjen javën e ardhshme, pasi kandidatja që ai mbështeti në zgjedhjet presidenciale humbi para një rivali pro-rus.
Kryeministri bullgar Boyko Borissov ka thënë se do të tërhiqet pasi kandidatja që partia e tij mbështeti në zgjedhjet presidenciale, kryetarja e parlamentit Tsetska Tsacheva, mori vetëm 35 për qind në zgjedhjet e të dielës.
Sipas medias lokale, Borissov bëri gjithashtu thirrje për një zgjedhje të hershme parlamentare pas mposhtjes së Tsachevas.
Lajmërimi erdhi pasi Rumen Radev, i cili është pro lidhjeve më të ngushta me Rusinë, fitoi zgjedhjet presidenciale në Bullgari të dielën.
Radev, kandidati i mbështetur nga Partia opozitare Socialiste, fitoi 58 për qind të votimit, sipas të dhënave të sondazheve.
Borissov më herët u zotua se do të tërhiqej nëse Tsacheva do të humbiste raundin e parë të zgjedhjeve, por u tërhoq dhe tha se do ta bënte këtë nëse ajo humbte në balotazh.
Borissov të dielën përgëzoi Radevin për fitoren e tij dhe votuesit “që kishin ndryshuar situatën politike”.
“Nga rezultatet është e qartë që koalicioni qeverisës nuk ka shumicë dhe nuk mund të miratojë madje as buxhetin,” tha kryeministri bullgar, sipas medias lokale.
Borissov i ka bërë thirrje presidentit Rosen Plevneliev të emërojë një qeveri të përkohshme duke përdorur një listë mesa duket nga Partia opozitare Socialiste bullgare, BSP, e cila mbështeti Radevin.
Një njeri që ka hyrë së fundmi në politikë, ish-komandanti i Forcave Ajrore Radev mendohet si një mik i Rusisë, me një qëndrim të fortë kundër emigrantëve.
Pavarësisht kësaj, Radev tha për Radion Kombëtare Bullgare se ai mbështeste orientimin e qartë Euro-Atlantik të Bullgarisë.
“Pse duhet eurofilia të nënkuptojë patjetër Rusofobi?”, pyeti Radev, duke shtuar se një polaritet i tillë ishte i sëmurë.
“Deri së fundmi, unë drejtoja një avion luftarak sovjetik. Jam diplomuar në një akademi amerikane, por jam një gjeneral bullgar. Kauza ime është Bullgaria,” tha Radev para sondazheve të ditës së diel.