Duke ndërthurur pikturën me terapinë e artit dhe integrimin social, ekspozita “Edhe unë bëj art” shfaq pikëpamjen shumëngjyrëshe për botën të fëmijëve me vështirësi në shikim dhe dëgjim.
Në ditën ndërkombëtare të personave me aftësi të kufizuara, 3 dhjetor, në ambientet e Muzeut Historik Kombëtar në Tiranë u çel ekspozita “Edhe unë bëj art”, në të cilën u shfaqën pikturat e fëmijëve me vështirësi në shikim dhe dëgjim.
Ekspozita e ndërtuar në bazë vullnetare nga projekti “Dashuri përmes ngjyrave” i organizatës Liburnetik në bashkëpunim me Institutin e Nxënësve që nuk Shikojnë, Ramazan Kabashi dhe Institutin e Nxënësve që nuk Dëgjojnë synon të integrojë përmes artit fëmijët me aftësi ndryshe.
“Edhe unë bëj art” është finalizimi i një pune të nisur në prill 2016 mes profesionistëve të pikturës, psikologëve të terapisë së artit dhe fëmijëve të cilët kanë vështirësi në shikim dhe dëgjim në përmasat 70-90%.
“Synimi i projektit vullnetar ishte t’i jepnim një formë dëshirës së madhe të fëmijëve për t’u angazhuar dhe për të shprehur pikëpamjen e tyre të botës përmes ndërthurjes së artit dhe emocioneve,” tha për BIRN Lorela Musta, drejtoreshë e organizatës Liburnetik, që punon për zhvillimin shoqëror përmes ideve inovative.
“Pikturat tregojnë gjithashtu përmirësimin e teknikës së vizatimit paralelisht me përmirësimin e gjendjes emocionale të fëmijëve pjesëmarrës, ndonëse disa prej tyre kanë kërkuar më tepër vëmendje dhe kujdes gjatë përgatitjeve,” shtoi ajo.
“Kjo ekspozitë ka pasur veçanërisht ndikim pozitiv te gjendja psikosociale e fëmijëve, të cilët janë më bërë më aktivë dhe të hapur në qëndrimin e tyre shoqëror,” tha për BIRN Taulant Sheme, koordinator i Institutit të Nxënësve që nuk Shikojnë, Ramazan Kabashi.
“Jemi të lumtur që kemi arritur të përçojmë te ta pozitivitetin për jetën përmes integrimit social dhe përmirësimit të gjendjes emocionale,” shtoi ai.
Mateo 13-vjeçar, i cili është prezantuar në ekspozitë me një pikturë personale dhe një bashkëpunim thotë se eksperienca e ka miqësuar më shumë me pjesëmarrësit e tjerë të ekspozitës dhe se kjo është një nxitje që ai ta ndjekë më seriozisht dëshirën e tij për të pikturuar si profesion në të ardhmen.
“Piktura më jep shumë kënaqësi, ashtu sikurse edhe natyra kur pikturoj peizazhe, ndaj kur të rritem dua të bëhem piktor,” tha ai duke shtuar se është gjithashtu i lumtur se pjesëmarrja e tij në ekspozitë e ka bërë familjen krenare.
Pikturat shumëngjyrëshe dhe plot dashuri për jetën të fëmijëve me vështirësi në shikim dhe dëgjim do të ekspozohen në Muzeun Historik Kombëtar deri më 31 dhjetor.