I akuzuar për korrupsion me 18 milionë dollarë, palestinezi Mohammed Dahlan, i cili është rival kryesor i presidentit Mahmoud Abbas dhe ka lidhje të forta me liderët ballkanas, do të gjykohet javën e ardhshme në atdhe.
Mohammed Dahlan, kryerivali i fuqishëm i presidentit palestinez Mahmoud Abbas, do të përballet me një gjykatë në Palestinë me akuzat e përvetësimit të 18 milionë dollarë nga paratë e publikut në atdhe.
Në një deklaratë të shkruar për BIRN, zyra e Abbas tha se gjykata anti-korrupsion në Ramallah, në Bregun Perëndimor, ka rihapur gjyqin dhe ka planifikuar një seancë më 14 dhjetor “për të rishqyrtuar çështjen kriminale kundër Dahlan”.
Dahlan ka pretenduar gjithnjë pafajësi, duke thënë se është viktimë e përndjekjes politike. Avokati i tij palestinez, Sevag Torossian, më herët i ka thënë BIRN se akuzat për korrupsion kundër klientit të tij vijnë për “çështje kontabiliteti”.
Por ai nuk iu përgjigj kërkesave tona për koment mbi zhvillimet më të fundit dhe BIRN nuk ka mundur të kontaktojë direkt me Dahlan.
Dahlan, i cili ka shtetësi malazeze që prej 2010 dhe shtetësi serbe prej 2013, u akuzua për përvetësim të 18 milionë dollarëve para publike në 2007 nga Autoriteti Palestinez, PA.
Sipas aktakuzës, paratë u vunë në llogari private të kontrolluara nga Dahlan i cili ishte shef i sigurisë së PA në atë kohë, përpara se të tërhiqeshin nga partnerët e tij.
Prokuroria pretendon se Dahlan nuk ka ofruar prova se ku u shpenzuan paratë.
Çështja u pezullua në prill 2015 pasi një gjykatë vendosi se një vendim presidencial për të hequr imunitetin e Dahlan duhet marrë nga parlamenti.
Ky vendim u përmbys nga gjykata kushtetuese në Ramllah muajin e shkuar.
Gjykata vendosi se Abbas kishte tagër të hiqte mbrojtjen e deputetit nga prokuroria pasi parlamenti palestinas nuk është në funksion, për shkak të mosmarrëveshjes me dy lëvizjeve politike në vend, Fatah dhe Hamasit.
Si një këshilltar për princin Muhammad Bin Zayed, Princin e Kurorës së Abu Dabit, Dahan ka luajtur një rol kritik në krijimin e lidhjeve politike dhe ekonomike mes vendeve të Gjirit dhe Serbisë e Malit të Zi.
Gjatë kësaj ai gjithashtu krijoi lidhje të afërta me kryeministrin serb Aleksandër Vuçiç dhe ish-homologun e tij malazez, Milo Djukanoviç. Ai i siguroi vetes shtetësi nga të dyja vendet pavarësisht përndjekjes nga akuzat për korrupsion dhe vrasje.
55-vjeçari dikur shihej si trashëgimtari i dukshëm i Yasser Arafat por humbi përkundrejt Abbas në 2003. Ai u dëbua nga lëvizja Fatah në 2011 pasi Abbas e akuzoi atë për korrupsion dhe la të kuptohej se mund të ishte përfshirë në vdekjen e Arafat, një akuzë që u rishfaq në javët e fundit në një raport nga komisioni special palestinez.
Duke jetuar në mërgim në Abu Dabi që atëherë, ndërsa kishte me qira gjithashtu një vilë luksoze në Beograd, ai ka formuar një rrjet të fuqishëm mbështetësish që shtrihen në Europë dhe Lindjen e Mesme dhe ka ndërtuar mbështetje për veten në Gaza dhe Bregun Perëndimor duke kanalizuar financimet e Gjirit në kampet palestineze të refugjatëve.
Ndërsa Dahlan pohon publikisht se nuk është i interesuar të pasojë Abbas, ai mbetet garuesi kryesor për pozicionin dhe nuk e ka mbajtur sekret dëshirën për t’u rikthyer në politikë në atdhe.
Abbas ka refuzuar të flasë për mosmarrëveshjen e tij me Dahlan, i cili është dënuar tashmë në mungesë me dy vite burg për shpifje, pavarësisht presionit nga Emiratet e Bashkuara Arabe, Arabia Saudite, Egjipti dhe Jordania.
Zyrtarët palestinez i thanë BIRN se Dahlan po hetohet në lidhje me vrasjet e 13 kundërshtarëve në Gaza kur ishte shef i sigurisë në PA.
Taktikat e grushtit të hekurt të Dahlan çuan që zona të merrte pseudonimin “Dahlanistan” dhe ai pranoi në një intervistë me Vanity Fair në 2008 se atje ndodhën “gabime”. Megjithatë ai pohoi se nuk ishte vrarë apo torturuar askush nën urdhrat e tij.