Një tubim në kryeqytetin e Bosnjës, që u rrethua në vitet 1990, do të solidarizojë aktivistë të shoqërisë civile dhe qytetarët e tjerë me sirianët në Alepon lindore.
Një tubim do të mbahet në Sarajevë të mërkurën për të treguar solidaritet me njerëzit në Alepo, ku vendasit në lagjet e fundit të mbajtura nga rebelët në lindje të qytetit sirian të rrethuar pritën për ndihmën e forcave pro-qeveritare që ishin afruar.
Shoqatat kulturore dhe civile kanë organizuar së bashku demonstratën, që do të mbahet jashtë qendrës tregtare BBI në Sarajevën qendrore në orën 15.
“Si një qytet që i ka mbijetuar rrethimit më të gjatë në periudhën moderne, si qytetarë të Sarajevës, ne duam të themi te populli i Sirisë se e kuptojmë vuajtjen dhe terrorin që ata po kalojnë dhe njëkohësisht ftojmë fuqitë e botës të përgjigjen siç duhet – arsye përse presim një përgjigje të madhe ndaj këtij eventi,” tha në një deklaratë Komiteti i Organizimit për protestën, publikuar në uebsajtin e OJQ-së Koordinimi i Boshnjakëve.
Tubimi është pjesë e fushatës #StandËithAleppo dhe organizatorët theksuan se ishte për njerëzit e çdo feje dhe bindje politike.
Elvis Piviç, kryetar i Lëvizjes për Mbrojtjen e Trashëgimisë Kulturore Isa Beg Ishakoviç, bëri thirrje që qytetarët e Sarajevës të marrin pjesë në tubim.
“Nëse njerëzit e Sarajevës nuk tregojnë solidaritet me qytetarët e Alepos, atëherë kush do ta bëjë?” pyeti Piviç.
“Sarajeva është një simbol në historinë e kohëve të fundit si qyteti që vuajti rrethimin më të gjatë në historinë botërore në zemër të Europës. Sot, përpara gjithë botës, njerëzit në Alepo po vdesin çdo ditë, siç po vdisnin njerëzit në Sarajevë në vitet 1990,” tha ai për BIRN.
Sipas zyrës së të drejtave të njeriut të OK cituar nga BBC të martën, forcat rebele në Alepo thuajse ishin mundur teksa forcat qeveritare afroheshin, kur hynë në shtëpitë e Alepos lindore dhe filluan të vrasin civilë pa e menduar.
Video tmerruese të njerëzve të ngecur në pjesë të vogla të Sirisë së mbajtur nga rebelët u postuan në rrjetet sociale dhe uebsajtet botërore të lajmeve ndërssa bombardimet u intensifikuan.
Zyrtarët turq thanë se një armëpushim u bë për të lejuar civilët të largoheshin, raportuar nga The Guardian, por të mërkurën në mëngjes evakuimi u shtye.
Grupi vullnetar sirian Helmetat e Bardha postoi “të gjitha rrugët dhe ndërtesat e shkatërruara janë plot kufoma”.
“Këto gjëra ndodhën në Bosnje 21 vite më parë,” tha për BIRN studentja 19-vjeçare Sevka Kulovaç.
“Ata po vrasin fëmijë. Përse? Për politikë? Kjo nuk ka kuptim. Njerëzit në Sarajevë e dinë se çfarë është lufta – dhemb shumë,” shtoi ajo.
Gazetari 29-vjeçar, Sedin Saliç i cili do të marrë gjithashtu pjesë në tubim, i tha BIRN: “Të paktën ne mund të dalim dhe të tregojmë se çfarë kuptojmë. Tani kemi një lloj paqeje dhe kemi pushtet të dërgojmë një mesazh”.
Ai shtoi: “Ne e dimë se si është të jetosh i rrethuar, nën snajper dhe zjarr artilerie për shumë ditë, muaj, vite”.
Sarajeva u rrethua nga serbët e Bosnjës nga prilli 1992 deri në shkurt 1996, kohë gjatë të cilës u ndërpre furnizimi me ujë dhe energji elektrike dhe civilët u vranë me snajperë dhe predha në shtëpi dhe rrugë.
Rreth 10,000 njerëz përfshirë më shumë se 1000 fëmijë mendohet se kanë vdekur.
