Rreth dy miliard njerëz vuajnë nga uria në shkallë globale. Përmes pesë hapave, bota mund ta zhdukë urinë deri në vitin 2030, argumenton Ertharin Cousin nga Programi Ushqimor i OKB.
Çdo ditë shumë burra dhe gra në vende të ndryshme të globit hasin vështirësi në sigurimin e ushqimit për fëmijët e tyre. Kur flasim rreth Synimeve të Zhvillimit të Qëndrueshëm, SDG, flasim rreth transformimit të jetës së këtyre familjeve që janë në fundin e piramidës ekonomike. SDG-të nuk janë thjesht aspiruese, por na ofrojnë një plan të drejtuar nga të dhënat për arritjen e paqes dhe begatisë mbarëbotërore dhe pranojnë se duhet të shkojmë deri te ata që janë të lënë pas – qofshin në vendet në zhvillim apo në ato të zhvilluara. SDG-të shërbejnë si një thirrje për të vepruar për të gjithë ne, duke na nxitur të bashkohemi në partneritet për të zgjidhur disa nga problemet më urgjente dhe më të vështira historikisht të njerëzimit.
I dyti nga këto synime kërkon që ne t’i japim fund urisë – një sfidë që disa besojnë se është shumë e ngatërruar ose shumë e shtrenjtë për t’u tejkaluar. Synimi i Zhvillimit të Qëndrueshëm për Zero Uri nuk është i pamundur. Si drejtor ekzekutiv i Programit Botëror të Ushqimit, organizata më e madhe humanitare që po lufton urinë në shkallë botërore, unë drejtoj një skuadër globale të dedikuar për të arritur këtë synim. Ne dimë se asnjë organizatë nuk do ta arrijë e vetme “Zero Urinë” – apo këdo nga synimet e tjera – por, duke punuar së bashku për të gjetur zgjidhje të qëndrueshme inovative, ky synim është i arritshëm deri në 2030.
Këto janë pesë hapat për të arritur Zero Uri:
T’i vëmë në krye ata që janë në fund:
Për të kuptuar potencialin e plotë të ekonomisë sonë të globalizuar, qeveritë kombëtare duhet të zgjerojnë skemat e mbrojtjes shoqërore për më të pambrojturit. Duke e ofruar këtë mundësi të zhvillimit ekonomik të barabartë, do të shtohet fuqia blerëse e dy miliard personave më të varfër, që në këmbim do të krijojë rritje të kërkesës, do të gjenerojë vende të reja pune dhe do të nxisë ekonomitë vendore. Investimi në zhvillimin gjithëpërfshirë nuk është vetëm gjëja e duhur për t’u bërë, por ka edhe kuptim nga aspekti i biznesit.
Të hapet rruga nga ferma në treg:
Aksesi në ushqim të përballueshëm dhe të shëndetshëm për këdo – të gjithë 7 miliardë njerëzit – është jetësor. Ne duhet të jemi inovativë dhe të investojmë në bërjën më efikas të zinxhirëve tonë të furnizimit duke zhvilluar tregje të qëndrueshëm. Për të mbështetur këto tregje, duhet gjithashtu të përmirësojmë infrastrukturën rurale, rrugët në veçanti, magazinat dhe elektricitetin, duke i ofruar fermerëve mundësinë të arrijnë një bazë më të gjerë konsumatori.
Pakësim i ushqimit të mbetur:
Nga katër miliardë ton metrikë ushqim që prodhojmë çdo vit, një e treta shkon dëm, duke i kushtuar ekonomisë globale rreth 750 miliardë dollarë në vit. Në vendet e zhvilluara, ushqimi shpesh shkon dëm në pjatë, ndërsa në vendet në zhvillim humbet gjatë prodhimit, pasi të mbjellat shpesh nuk përdoren apo nuk përpunohen për shkak të kushteve të këqija të magazinimit ose ngaqë fermerët nuk mund t’i çojnë mallrat në treg.
Inkurajimi i një varieteti të qëndrueshëm të mbjellash:
Sot, kudo në glob, katër të mbjella (orizi, drithërat, misri dhe soja) përfaqësojnë 60% të të gjitha kalorive të konsumuara. Për të zgjidhur sfidat e ndryshimit klimatik, disponueshmërinë dhe aksesin e ushqimit, duhet të ndihmojmë fermerët të eksplorojnë dhe identifikojnë një varietet më të madh të mbjellash. Diversiteti bujqësor i të mbjellave ka potencialin t’i ofrojë komuniteteve vlerat ushqyese të nevojshme për rritje të shëndetshme dhe një stil jetese aktiv. Për të arritur këtë objektiv ne duhet të edukojmë fermerët në kultivimin e këtyre të mbjellave, që përfshin sigurimin e aksesit të tyre në mjetet dhe aftësitë e nevojshme. Po aq e rëndësishme është që ne të ndërtojmë një treg konsumatori për këto ushqime të ndryshme duke edukuar komunitetet rreth rëndësisë ushqimore të të ngrënit një shumëllojshmëri ushqimesh.
Ta bëjmë ushqimin prioritet, duke filluar me 1000 ditët e para të një fëmije:
Asgjë nuk është më i rëndësishëm se zhvillimi i një fëmije me ushqim të mirë dhe të shëndetshëm, veçanërisht në 1000 ditët e para (nga konceptimi në moshën 2-vjeçare). Për të paralajmëruar zhvillimin jo të mirë dhe për të promovuar zhvillimin e shëndetshëm, duhet t’i sigurojmë fëmijëve dhe nënave akses në ushqimet e nevojshme.
Bashkohuni me ne në shpëtimin e jetëve, në ndryshimin e tyre dhe në ushqimin e ëndrrave. Le të bashkëpunojmë për të gjetur zgjidhje inovative dhe të qëndrueshme dhe për të arritur te personat që kanë nevojë për ndihmë. Nëse punojmë së bashku, do t’i arrijmë Synimet e Zhvillimit të Qëndrueshëm dhe do të kemi një botë pa uri – një Botë me Zero Uri.
Marrë me autorizim nga Weforum.org
