Në të gjithë rajonin, organizatat e kujdesit të kafshëve si dhe qytetarët e tjerë po bëjnë pjesën e tyre për të ndihmuar miqtë e tyre me gëzof ose pupla për t’i mbijetuar temperaturave të ulëta.
Me temperatura të akullta, nën zero që kanë përfshirë Ballkanin dhe që po vënë në rrezik shumë shpendë dhe kafshë, organizatat e mbrojtjes së tyre dhe vullnetarë të ndryshëm po përpiqen t’i ndihmojnë gjallesat për t’i mbijetuar motit të egër.
Media në Serbi dhe Kroaci po inkurajon qytetarët të krijojnë kasolle për qentë me kartonë, plastmasë dhe sfungjer.
Në kryeqytetin serb, Beograd, lagjja Stari Grad e qytetit ndërkohë ka krijuar shtëpi të veçanta për qentë me batanije dhe ushqim brenda, për të ndihmuar qentë e pastrehë të qytetit të mbrohen nga temperaturat e acarta.
Në kryeqytetin kroat, Zagreb, azili i qytetit për kafshët në Bizovec i ka bërë thirrje njerëve të dhurojnë batanije të reja ose të vjetra të të gjitha llojeve, në mënyrë që të ndihmohen qentë dhe macet e pastreha nga i ftohti.
Si pjesë e fushatës “Dimër i ngrohtë për të gjithë” azili tha se batanijet janë shumë të rëndësishme për t’i mbajtur kafshët “ngrohtë ndërsa presin për shtëpi të reja”.
“Dimri ka treguar dhëmbët dhe qentë, veçanërisht kotelet kanë nevojë për një vend të ngrohtë ku të flenë. Ne për këtë arsye i kërkojmë qytetarëve të organizohen në lagje dhe mes miqve, të afërmve dhe në shkolla apo firma ku punojnë… në mënyrë që të bëjnë diçka të dobishme për të tjerët, sepse nuk u kushton asgjë dhe se do të ndihen mirë me veten,” tha qendra e mirëmbajtjes së kafshëve.
Një tjetër strehë për kafshët në qytetin kroat Rijeka ka bërë thirrje për dhurime mbulesash dhe kashte, që funksionon shumë mirë për të izoluar të ftohtin.
OJQ-të po paralajmërojnë njerëzit se maceve të rrugës u pëlqen të flenë pranë motorave të ngrohtë të makinave në rrugë për të qëndruar ngrohtë.
Vendasve u kërkohet të nxjerrin jashtë fara për shpendët, duke theksuar se ata kanë nevojë për më tepër ushqim se zakonisht për t’i mbijetuar temperaturave të acarta.
Disa lokale në Beograd dhe në qytete në Bullgari kanë vendosur të lënë kafshët e rrugës të flenë brenda për të qëndruar ngrohtë.