Policia në Austri ka arritur përmes një operacioni të madh të depërtojë një rrjet të dyshuarish si xhihadistë me lidhje me ish-Jugosllavinë, sipas raportimeve të medias.
Disa të dyshuar nga Ballkani, ku përfshihen dy boshnjakë, ishin mes 11 personave të arrestuar të enjten në një operacion anti-terrorizëm nga policia austriake në qytetet e Vjenës dhe Gracit, sipas raportimeve lokale.
Tetë arrestimet e para përfshinin tre austriakë, dy boshnjakë, një sirian, një bullgar dhe një maqedonas, të gjithë meshkuj, sipas një zëdhënësi policie.
Raportimet thanë se katër arrestime u bënë në secilin prej dy qyteteve.
Tre arrestime të tjera – gjithashtu me të dyshuar nga Ballkani – u kryen më vonë atë ditë.
Xhami jozyrtare dhe apartamente në dy qytetet u bastisën gjithashtu nga mbi 800 forca policie, sipas agjencisë së lajmeve AFP, në një operacion të madh kundër një rrjeti të dyshuar xhihadistësh me lidhje me ish-Jugosllavinë.
Gazeta austriake Kronen Zeitung raportoi se operacioni lidhej me një grup që kishte marrëdhënie me një predikues mysliman nga Bosnja, Ebu Tejma, i cili u dënua me 20 vjet burg vitin e shkuar nga një gjykatë në Grac.
Tejma u dënua për rekrutim të të rinjve për të luftuar për Shtetin Islamik, ISIS dhe për përhapje të propagandës së ISIS.
“Si pjesë e një hetimi që vazhdon mbi të dyshuarit si anëtarë të organizatës terroriste ISIS, u mbajt një operacion i koordinuar dhe i planifikuar prej kohësh,” tha një zyrtar i prokurorisë në Grac për AFP.
Ndërsa Austria nuk ka qenë subjekt i sulmeve terroriste në vitet e fundit, autoritetet thonë se rreth 300 persona janë larguar ose janë përpjekur të largohen nga vendi për të luftuar për ISIS.