Ish-kryeministri dhe lideri i VMRO DPMNE Nikola Gruevski e kaloi afatin për të formuar një qeveri të re pasi dështoi në sigurimin e mbështetjes nga ish-partneri i tij, Bashkimi Demokratik për Integrim.
Bashkimi Demokratik për Integrim, BDI, që ishte partneri në koalicionin qeverisës së VMRO DPMNE në qeverinë e mëparshme, tha të dielën në mesnatë se nuk kishte marrë ende një vendim nëse do t’i bashkohej një administrate të re të kryesuar nga Gruevski.
Kjo do të thotë se Gruevski e kaloi afatin për të siguruar një shumicë me të paktën 61 deputetë në parlamentin me 120 vende dhe duhet ta rikthejë mandatin e tij te presidenti Gjorge Ivanov të hënën.
“BDI nuk mori një vendim sot për asnjë nga pesë opsionet që po konsiderojmë… sepse nuk kishte mjaftueshëm argumente për të zgjedhur secilin prej tyre”, tha zëdhënësi i BDI, Bujar Osmani për gazetarët në mesnatë, duke shkatërruar shpresat e VMRO DPMNE për një përgjigje pozitive.
Megjithatë pas marrjes së përgjigjes nga BDI, VMRO DPMNE tha në një deklaratë se zgjedhjet e reja ishin zgjidhja më e mirë për t’i dhënë fund ngërçit politik.
BDI më parë tha se kryesia po merrte në konsideratë pesë opsione – hyrjen në koalicion me VMRO DPMNE, koalicion me social demokratët e opozitës, formimi i një aleance të gjerë qeveritare, qëndrimin në opozitë ose zgjedhjet e reja.
Kryesia e partisë ka pasur këto opsione në mendje gjatë takimeve intensive që nga e premtja dhe sipas Osmanit, do të vazhdojë të bëjë të njëjtën gjë në ditët e ardhshme.
Sipas kushtetutës, Gruevski tani duhet të kthejë mandatin e tij, ndërsa presidenti Ivanov ka dhjetë ditë kohë për t’ia dhënë atë në një tjetër konkurrenti që do të përpiqet të sigurojë shumicën.
Për shkak të interpretimeve të ndryshme të dispozitave kushtetuese, vëzhguesit nuk janë plotësisht të sigurt nëse Ivanov duhet t’ia japë mandatin rivalit të Gruevskit, liderit të Social Demokratëve të opozitës, Zoran Zaev, partia e të cilit doli e dyta, duke fituar 49 deputetë në zgjedhjet më 11 dhjetor.
Një tjetër mundësi mund të jetë zgjedhja e një tjetër personi nga partia e Gruevskit – një lëvizje që do të zemëronte opozitën.
Kujtdo që do t’i jepet mandati, do të ketë në dispozicion 20 ditë për t’u përpjekur për krijimin e një qeverie, ku duket se BDI me 10 deputetët e vet do të luajë një rol.
Zgjedhjet e 11 dhjetorit erdhën pas një krize politike të stërzgjatur që rrotullohet rreth pretendimeve të opozitës se ish-kryeministri Gruevski ka përgjuar 20 mijë persona. Gruevski i mohoi akuzat.
Kjo i bën zgjedhjet dhe bisedimet për formimin e një qeverie të re veçanërisht të rëndësishme dhe me pasoja të thella për aktorët kryesorë të politikës, si dhe për të ardhmen e vendit.
