Një gjykatë franceze vendosi ta shtyjë vendimin e saj për lirimin e ish-kryeministrit të Kosovës Ramush Haradinaj apo dërgimin e tij në Serbi ku të gjykohet për krime lufte.
Gjykata e Apelit në Colmar në Francë tha të enjten se do ta japë vendimin e saj për ekstradimin e Ramush Haradinajt më 2 mars, sipas zëdhënësit për Aleancën për Ardhmërinë e Kosovës, Muharrem Nitaj, i cili ishte në gjyq.
Gjatë seancës, Haradinaj u pyet nëse pranon të ekstradohet në Serbi, e cila dëshiron ta gjykojë atë për krime lufte.
Haradinaj tha jo, duke këmbëngulur se çështja ishte krejtësisht politike.
“Kërkesa e Serbisë për ekstradim është një abuzim me ligjin,” tha ai, sipas raporteve të medias.
Ish-komandanti i Ushtrisë Çlirimtare e Kosovës, i bërë politikan, është liruar dy herë nga akuzat nga Gjykatën e Hagës për krime lufte të kryera gjatë konfliktit të viteve 1998-1999 në Kosovë.
Megjithatë, zyrtarët serbë këmbëngulin se ata kanë prova se Haradinaj ishte i përfshirë në krime të tjera lufte për të cilat ai s’është gjykuar ende.
Ata thonë se ai dyshohet për vrasje të civilëve, përfshirë vrasjen e një fëmije dy javësh, torturimin dhe përdhunimin e një të mituri.
Ata kanë kërcënuar gjithashtu se do të hakmerren nëse Parisi s’e dërgon atë në Beograd.
Arrestimi i tij në një aeroport francez pasi ai u nis nga Kosova muajin e kaluar rriti tensionet midis Beogradit dhe Prishtinës.
Arrestimi i Haradinaj në aeroportin francez javën e kaluar ka shkaktuar protesta nga shqiptarët brenda dhe jashtë Kosovës, të cilët bëjnë thirrje për lirimin dhe dënimin e arrestimit të tij si një akt politik.
Gjykata franceze e liroi Haradinajn me kusht më 12 janar, por e urdhëroi atë të qëndrojë në Francë nën mbikëqyrje gjyqësore ndërsa autoritetet shqyrtojnë nëse duhet ta dërgojnë apo jo atë në Serbi që të përballet me akuzat për krime lufte.
Zv/kryeministri i Serbisë Rasim Ljajiç tha të mërkurën në mbrëmje se nëse gjykata franceze vendos ta dërgojë Haradinajn në Beograd, do të ishte një “surprizë”, sepse gjykatat në vendet e tjera më parë kanë vendosur ta lirojnë ish-guerilasin e kërkuar nga Serbia.
“Nëse vendimi bazohet në argumentet ligjore dhe jo në ato politike, ndoshta mund të jetë ndryshe,” tha Ljajiç për Radio-Televizionin Vojvodina.
Ljajiç shtoi se nëse gjykata franceze vendos ta lirojë Haradinajn, Serbia duhet të vazhdojë të këmbëngulë për arrestimin e tij.
