Gjykata Kushtetuese ka hedhur poshtë ankimin e Shoqatës Kombëtare të Gjyqtarëve, SHKGJ, kundër ligjit të vetingut, pasi ka gjykuar se ai është i njëjtë me ankesën tashmë të rrëzuar të Partisë Demokratike.
“Në lidhje me kërkesën e paraqitur nga SHKGJ-ja, Kolegji konstaton se ajo ka objekt të njëjtë me kërkesën e marrë më parë në shqyrtim nga Gjykata, si edhe përmban të njëjtat shkaqe,” shkruhet në vendimin e gjykatës të bërë publik të martën.
“Në këto kushte, Kolegji vlerëson se për sa kohë që pretendimi për papajtueshmërinë e tyre mbështetet në të njëjtat shkaqe të paraqitura më parë dhe kërkuesja nuk ka paraqitur asnjë shkak të ri në këtë drejtim, këtij pretendimi i është dhënë përgjigje me vendim përfundimtar, për rrjedhojë nuk mund të merret më në shqyrtim prej saj,” shtoi Gjykata Kushtetuese.
Me 22 Dhjetor, Gjykata Kushtetuese rrëzoi kërkesën e një numri deputetësh të Partisë Demokratike kundër ligjit nr.84/2016 “Për rivlerësimin kalimtar të gjyqtarëve e prokurorëve në Republikën e Shqipërisë,” duke i hapur rrugën zbatimit të tij në praktikë.
Ligji për “rivlerësimin kalimtar të gjyqtarëve dhe prokurorëve në Republikën e Shqipërisë”, i njohur gjerësisht si ligji i vetingut u pezullua përkohësisht nga Gjykata Kushtetuese pas ankesës së dorëzuar atje nga Partia Demokratike. Në kërkesën e saj, PD e cilësonte ligjin si antikushtetues, ndërsa kontestimi kryesor lidhej me rolin që institucionet në varësi të ekzekutivit do të kenë në kontrollin e gjyqtarëve dhe prokurorëve.
Duke njohur konfliktin e interesit me këtë ligj, Gjykata Kushtetuese iu drejtua për mendim Komisionit të Venecias. Më 10 dhjetor, ky Komision vlerësoi se ligji është në përputhje me standardet europiane dhe se institucionet e reja që do të kryejnë vetingun, sipas saj kanë mundësinë të kontrollojnë informacionet që vijnë nga institucionet në varësi të ekzekutivit.
Zbatimi i ligjit të vetingut është kushti kyç që Bashkimi Europian i ka vendosur Shqipërisë për hapjen e negociatave. Vendimi i Gjykatës Kushtetuese i hapi dritën jeshile ngritjes së institucioneve që do të kalojnë në sitë gjyqtarët dhe prokurorët si dhe nisjen e procesit që pritet të pastrojë sistemin e drejtësisë nga personat e dyshuar për korrupsion dhe lidhje me krimin e organizuar.