Këshilli i Lartë i Drejtësisë njoftoi të martën se ka nisur një hetim administrativ për 5 gjyqtarë të Gjykatës së Apelit për Krimet e Rënda, pas shpalljes si të pafajshëm të 11 anëtarëve të organizatës famkeqe” Hakmarrje për Drejtësi” .
“Nga shqyrtimi paraprak i ngjarjes së transmetuar dhe nga shqetësimi i ngritur nga Presidenti i Republikës, njëherazi kryetar i Këshillit të Lartë të Drejtësisë, u konstatua se ka vend që Inspektorati i KLD-së, të verifikojë veprimtarinë gjyqësore të gjyqtarëve të Gjykatës së Apelit për Krime të Rënda Tiranë, Alaudin Malaj, Artur Kalaja, Stavri Kallço, Sotiraq Lubonja dhe Etleva Temo, për akte dhe sjellje që diskreditojnë rëndë figurën e gjyqtarit në funksion të zgjidhjes së parregullt të një çështjeje gjyqësore penale,” tha KLD nëpërmjet një njoftimi për shtyp.
Sipas KLD-së gjyqtarët dyshohen se “haptazi nuk i janë referuar ligjit ose fakteve për shkak të pakujdesisë së rëndë ose dashjes; apo në mënyrë të pajustifikuar, kanë kryer akte dhe sjellje të papërshtatshme gjatë ushtrimit të detyrës ose jashtë saj, që diskreditojnë pozitën dhe figurën e gjyqtarit ose që dëmtojnë rëndë besimin e publikut në sistemin gjyqësor.”
Përmes vendimit të saj të shpallur të hënën, pesë gjyqtarët e Apelit të Krimeve të Rënda vendosën të rrëzojnë dy dënimet me burgim të përjetshëm për të akuzuarit si drejtues të organizatës, Orik Shyti dhe Altin Arapi dhe mbi 170 vjet të tjera burg për tetë anëtarët e tjerë të “Hakmarrjes për Drejtësi”.
Gjykata e Apelit të Krimeve të Rënda e pati gjykuar njëherë organizatën “Hakmarrja për Drejtësi” dhe në korrik të vitit 2009 vendosi dënime të rënda për anëtarët e saj, mes të cilave edhe dy dënime me burgim të përjetshëm. Por vendimi i formës së prerë u rrëzua nga një Kolegj Penal i Gjykatës së Lartë më 9 mars të vitit 2016, duke i lënë një shteg të hapur rigjykimit të saj.
Në njoftimin e saj, KLD bëri të ditur se për efekt hetimi do të evidentojë çdo të dhënë publike që tregon shkelje me pasojë përgjegjësinë disiplinore të gjyqtarëve të çështjës, pa dhënë detaje se kujt të dhënave i referohet.
“Për këtë qëllim do të merren kopje të akteve që dokumentojnë rezultatet e hetimit, të administrohen regjistrimet audio të seancave gjyqësore, vendimi gjyqësor përfundimtar, si dhe të merren shpjegime nga gjyqtarët, sekretarja gjyqësore, prokurori i çështjes, kryetari i gjykatës, si dhe çdo subjekt tjetër që mund të ketë dijeni për rrethanat e hetimit,” përfundoi njoftimi i KLD-së.
