Megjithëse politikanët në Rumani kanë rënë dakord të mbajnë një votim publik për të luftuar korrupsionin, fundi nuk është ende afër për protestat anti-qeveri, të cilat nisën pas lehtësimit të dënimit të korrupsionit.
Teksa protestuesit dolën në rrugët e Bukureshtit të hënën për të katërmbëdhjetën mbrëmje radhazi të protestave antiqeveritare, parlamenti i Rumanisë ra dakord të mbajë një referendum për të luftuar korrupsionin e zyrtarëve.
Plot 310 deputetë votuan pro referendumit të propozuar nga presidenti Klaus Iohannis, që synon të rrisë mbështetjen për luftën kundër korrupsionit.
Megjithatë, nuk është e qartë se çfarë pyetjeje do t’i bëhet votuesve në premtimin për referendum dhe lëvizja ka pak gjasa të ndalojë protestat.
“Duket se qeveria dhe parlamenti nuk po i kushtojnë rëndësi kërkesave tona. Ne po shpresonim që qeveria të jepte dorëheqjen, por tani presim të paktën një vendim të qartë mbi urdhrin kontraversal të emergjencës që do të ulte dënimin e korrupsionit,” tha Melania, 29 vjeçe, një protestuese e cila punon si specialiste komunikimi në një kompani në Bukuresht.
Protestat filluan kur kabineti i kryeministrit Sorin Grindeanu kaloi një dekret emergjent më 31 janar i cili dekriminalizonte shkelje korrupsionin në nivel të ulët, përfshirë abuzimin me detyrën nëse shuma ishte më e vogël se 43,200 euro.
Kjo u bashkua me një falje në masë për të dënuarit jo të dhunshëm që ishin në burg.
Protestat – më të mëdhatë që nga rënia e komunizmit, po ndodhin në më shumë se 50 qytete në vend – detyruan qeverinë të tërhiqet nga dekreti.
Ministri i drejtësisë Florin Iordache, një nga arkitektët e dekretit, gjithashtu dha dorëheqjen më 7 shkurt.
Por protestat vazhduan, ku protestuesit bënë thirrje për dorëheqje të kryeministrit Grindeanu.
Pavarësisht zemërimit, qeveria refuzoi të japë dorëheqjen duke thënë se publiku e kishte keqkuptuar reformën që do të pakësonte mbipopullimin e burgjeve rumune.
Protestuesit tani po presin me ankth një vendim të parlamentit, që do të konfirmojë në ditët në vazhdim tërheqjen e dekretit polemik të emergjencës.
“Parlamenti duhet ta anullojë vendimin. Ndryshe protestat do të jenë edhe më të mëdha,” thotë Stefan Stanescu, një tjetër pjesëmarrës në protestat në Bukuresht.
Rumania konsiderohet si një nga shtetet më të korruptuara në BE dhe ka bërë progres të kufizuar në këtë aspekt që kur u anëtarësua në BE në 2007.
Por përpjekjet janë intensifikuar në gjashtë vitet e fundit në lidhje me anti-korrupsionin, konfliktin e interesit, abuzimin me pushtetin dhe mashtrimin dhe dhënien e tenderave të lidhura me ryshfetet.