Ndërsa imigracioni në përgjithësi në Britani ra për vitin 2016 në shifrat më të ulëta në dy vitet e fundit, numri i rumunëve dhe bullgarëve që emigruan në Mbretërinë e Bashkuar arriti në 74.000 persona.
Migrimi i përgjithshëm vjetor neto në Mbretërinë e Bashkuar ishte 273.000 persona, deri në shtator 2016, një rënie me 49.000 individë krahasuar me të njëjtën periudhë të vitit 2015, – treguan të dhënat e fundit të migrimit bërë publike nga Zyra Kombëtare e Statistikave, ONS.
Të parat shifra të publikuara pas votimit Brexit në qershor 2016 tregojnë se emigracioni në Mbretërinë e Bashkuar ka rënë nën 300.000 persona për herë të parë në dy vjet.
Nicola White, kreu i statistikave të migracionit në ONS, theksoi se numri e shtetasve nga Europa Lindore që vendosën të largohen nga Britania në shtator 2016 ishte i konsiderueshëm.
Një total prej 39.000 personash nga vendet e BE-së: Polonia, Sllovakia, Lituani, Letonia, Republika Çeke, Hungaria dhe Estonia vendosën të largohen nga Britania gjatë periudhës së vëzhgimit, ku polakët ishin më të shumtë në numër 12 mijë.
Njëkohësisht, një numër rekord bullgarësh dhe rumunësh migruan në Britani në nëntë muajt e parë të 2016. Kjo shifër u rrit me 19.000 krahasuar me vitin 2015, duke arritur në 74.000.
“Megjithëse kemi parë një rënie të migracionit neto nga shtetasit e BE-së, ka pasur rritje të vazhdueshme imigracioni nga Rumania dhe Bullgaria, ndaj është shumë herët të themi se cilat kanë qenë rezultatet e referendumit në kuptimin afatgjatë të migracionit ndërkombëtar”, tha zyra e statistikave.
Përpara votimit Brexit, një total prej 170.000 rumunësh dhe 65.000 bullgarë punonin në Mbretërinë e Bashkuar.
Në përgjithësi numri i shtetasve të BE që migruan në Britani në nëntë muajt e parë të 2016 ra në 165.000.
Bullgarët dhe rumunët fituan të njëjtat të drejta pune në Mbretërinë e Bashkuar si shtetas të tjerë të BE-së në janar 2014 dhe numri i atyre që punojnë në Britani është rritur vazhdimisht që atëherë, të tërhequr pjesërisht prej nivelit të ulët të papunësisë në rreth 5 për qind, i treti më i ulët në BE.