Lideri i opozitës maqedonase Zoran Zaev tha se vendimi i presidentit për të mos i dhënë mandatin prë krijimin e qeverisë është i barasvlefshëm me një tentativë grushti shteti, ndërsa kryeministri shqiptar Edi Rama u shpreh se pa shqiptarë nuk ka Maqedoni.
Zoran Zaev, lideri i partisë opozitare Social Demokrate, LSDM, akuzoi presidentin të mërkurën në mbrëmje për grusht shteti pasi ky refuzoi t’i jepte Zaevit mandatin për të formuar një qeveri.
Presidenti Gjorge Ivanov vendosi të mërkurën për mos ia japë Zaevit mandatin, pavarësisht se lideri i LSDM tregoi se zotëron shumicën e nevojshme parlamentare për këtë.
Zaev këmbënguli që presidenti të tërhiqet nga vendimi i tij për të refuzuar dhënien e mandatit.
“Ivanov ka bërë grusht shteti. Ai e ka shtyrë edhe më tej Maqedoninë në një krizë kushtetuese dhe kombëtare duke mohuar vullnetin e shumicës së shtetasve dhe duke ndaluar transferimin ligjor dhe legjitim të pushtetit”, tha Zaev.
“I bëj thirrje qytetarëve të mos bien pre e provokimeve. Të qëndrojmë të qetë dhe në anën e proceseve demokratike që çojnë drejt formimit të një qeverie të re demokratike që do të përqendrohet te nevojat reale të njerëzve dhe te sundimi i ligjit”.
Zaev gjithashtu tha se partia e tij po analizon me kujdes hapat e tjerë.
“Duhet të jemi të zgjuar në hapat e ardhshëm. Dikush ndoshta pret kundër-reagime, kundër-provokime. Ne nuk do ta lejojmë këtë”.
Presidenti maqedonas ka refuzuar t’i japë liderit social demokrat Zoran Zaev mandatin për të krijuar një qeveri, pavarësisht se ky arriti shumicë në parlament, me pretendimin se ai kishte potencialin “të shkatërronte vendin” duke pranuar kërkesat e partive shqiptare etnike në vend.
“Kushtetuta dhe ndërgjegjja më ndalojnë t’i jap mandat kujtdo që do të shkatërrojë sovranitetin dhe integritetin e Maqedonisë,” tha Gjorge Ivanov, duke shtuar se Zaev duhet së pari të refuzojë publikisht “platformën që vjen nga një vend tjetër”, duke iu referuar Shqipërisë.
Ivanov këmbënguli se platforma etnike shqiptare, që ka qenë kushti kryesor i partive shqiptare etnike për të mbështetur cilëndo koalicion qeverit pas zgjedhjeve të 11 dhjetorit, shkelte kushtetutën dhe Marrëveshjen e Paqes së Ohrit të 2001 duke i dhënë më shumë të drejta shqiptarëve etnikë në vend.
Komisioneri i BE për Zgjerim, Johannes Hahn deklaroi të mërkurën në mbrëmje se BE-ja “ka përsëritur vazhdimisht se të gjithë liderët në vend, përfshirë presidentin, duhet të respektojnë rezultatin e zgjedhjeve të fundit”.
“Në një demokraci, duhen njohur shumicat parlamentare, edhe nëse dikujt nuk i pëlqejnë. Prandaj pres që të gjithë liderët politikë dhe institucionet të lënë procesin demokratik të vazhdojë – në interes të shtetasve të vendit,” shkroi Hahn në deklaratë.
Zaev, partia e të cilit ka 49 deputetë, fitoi mbështetjen e partive shqiptare pasi ra dakord me kërkesën e tyre për një ligj të ri të shtrirjes së shqipes nëpër të gjithë Maqedoninë.
Ai ra gjithashtu dakord për disa kërkesa të tjera të të ashtuquajturës platformë shqiptare që synon të sigurojë barazi për shqiptarët në Maqedoni.
Aktualisht shqipja është gjuhë zyrtare vetëm në ato zona ku shqiptarët përbëjnë të paktën 20 për qind të popullatës.
Partitë shqiptare ranë dakord për kërkesat e tyre pas një takimi në Tiranë, të organizuar nga kryeministri shqiptar Edi Rama. Ky i fundit reagoi të mërkurën mbrëma në Facebook duke iu përgjigjur presidentit maqedonas: