Mijëra njerëz u mblodhën në Prishtinë në mbështetje të ish-komandantit të Ushtrisë Çlirimtare të Kosovës dhe ish-kryeministrit Ramush Haradinaj, i cili u arrestua në Francë me një urdhër arresti të lëshuar nga Serbia.
Disa mijëra njerëz u mblodhën të shtunën në qendër të Prishtinës, duke i bërë thirrje Francës të lejojë politikanin Ramush Haradinaj, kryetari i Aleancës për Ardhmërinë e Kosovës, të lirohet që të kthehet në Kosovë.
“Haradinaj nuk është i vetëm dhe ai gëzon mbështetjen e popullit të Kosovës,” tha në tubim vëllai i tij Daut Haradinaj, i cili është gjithashtu anëtar i parlamentit me të njëjtën parti.
Haradinaj kërkohet në Serbi nën akuzat për krime lufte dhe u arrestua kur ai fluturoi për në Francë në janar.
Protestuesit kërkuan gjithashtu që Serbia të anulojë të gjithë urdhër-arrestet e saj për ish-luftëtarët e Ushtrisë Çlirimtare të Kosovës.
Ish-diplomati amerikan William Walker, kreu i misionit të OSBE-së në Kosovë në vitet 1998 dhe 1999, iu bashkua gjithashtu protestës të shtunën.
“Ramush Haradinaj është miku im i mirë. Unë jam këtu për të treguar solidaritet me të dhe me të gjithë ju,” tha Walker.
“Kam besuar gjithmonë se sistemi ligjor në Francë është më i miri në botë. Megjithatë, ajo që po ndodh me një hero të Kosovës është një fatkeqësi,” shtoi ai.
Haradinaj është liruar dy herë nga akuzat nga Gjykatën e Hagës për krime lufte të kryera gjatë konfliktit të viteve 1998-1999 në Kosovë.
Megjithatë, zyrtarët serbë këmbëngulin se ata kanë prova se Haradinaj ishte i përfshirë në krime të tjera lufte për të cilat ai s’është gjykuar ende.
Ata thonë se ai dyshohet për vrasje të civilëve, përfshirë vrasjen e një fëmije dy javësh, torturimin dhe përdhunimin e një të mituri.
Gjykata e apelit në qytetin francez Colmar të enjten vendosi ta shtyjë për në 6 prill seancën për ekstradimin e tij.
Gjykata e liroi Haradinajn me kusht më 12 janar, por e urdhëroi atë të qëndrojë në vend nën mbikëqyrje gjyqësore ndërsa autoritetet shqyrtojnë nëse duhet ta dërgojnë apo jo atë në Serbi që të përballet me akuzat për krime lufte.
